Танһчин райодт травмацутхлнгуд көдлжәнә
Хаалһд учрсн зеткртә йовдлмудын ашт медицинск дөн күрглһнә бүрдәмжин көдлмш ясрулһна федеральн шишлнг программ Хальмг танһчин аһуд шунмһаһар күцәгджәнә. Энүнә программар һурвн девснгтә һурвн травмцутхлнг секгдв. Эднә негнь эн жилин апрель сард Баһ Дөрвд селәнд көдлжәнә. Эн цутхлнг танһчин һурвн районд — Сарпинск, Октябрьск болн Баһ Дөрвдә райодын улст туслмж күргжәнә. Иим цутхлнг хаалһд учрсн зеткртә йовдлмудас көлтә әмнәсн хаһцсн улсин то баһрулх зөвтә. Энүнә специалистнр ахр болзгт шав авсн күүнд тер дарунь дор ормднь кергтә медицинск дөн күргжәнә. Энүнә хөөн шавстн кү цутхлнгд орулад цуг кергтә медицинск туслмж күргнә.
Болһамж угаһар йовж йовад Ик Царнг селәнә бәәрн күн Геннадий Кан унад өвдгән хамхлж. Энүг больницд орулв. Шин травмацутхлнгд хиругическ әнгд орад, гемтә улсин төлә энд бүрдәгдсн таал үзәд икәр өврв.
Ик Царнг селәнә бәәрн күн Геннадий Кан келсәр, районд иим шин цутхлнг секснь сән керг. Эн сарул, цуг таал бәәнә.
Энүнд у-сарул хорас бәәнә, хораст дулан. Капитальн ясврин хөөн больницин гер тас талдан бәәдл һарв. Энүнә тускар гемтә улс келнә.
Баһ Дөрвд селәнә бәәрн күүкд күн Бося Манджиеван келсәр, хораст дулан сарул, энд кевтәд бийән эмнүлж болжана.
Баһ Дөрвдә бәәрн күүкд күн Лидия Шувадурован келсәр, ясврин хөөн энд сольвр ил үзгджәнә. Цевр-цер, эмнүлх таал бәәнә.
Баһ Дөрвдә района цутхлнг больницин медлд травматологическ цутхлнг эн жилин апрель сард секгдв. Гемтә улсиг ахр болзгт больницд орулхин төлә травмацутхлнгиг негдгч давхрт орулв. Урднь энд терапевтическ әнг бәәсмн. Капитальн ясвр кеснә хөөн энүнд травмацутхлнг, хирургическ болн гинекологическ әнгүд көдлжәнә.
Баһ Дөрвдә района цутхлнг больницин ах эмчин дарук Валентина Басанован келсәр, ода хойр оперционн зал көдлжәнә. Гемтә улсиг орулж авлһна әнг бачм чинртә медицинск дөн крүгдг әнглә негдүләд, көдлхд амр болв.
Шин травмацутхлнг федеральн шишлнг программар секх арһ учрв. Хаалһд зеткртә йовдлмудт шав авсн улст медицинск дөн күрглһнә көдлмш бүрдәлһнә төлә кегджәнә. Эн программ хойр минһн йисдгч жиләс авн күцәгджәнә. Медицинск түрүн дөн күрглһнә болн шишлнг дөн күрглһнә шин травмацутхлнг һурвн района Сарпинск, Октябрьск болн Баһ Дөрвдә райодын улст туслмж күргжәнә. Эн райодын аһуһар М6 нертә федеральн хаалһ давж һарна. Энүнд дару-дарунь зеткртә йовдлмуд учрна. Эн жилин январь-декабрь сармудт зектртә йовдлмудт дөчн күн шав авсмн.
Баһ Дөрвдә района больницин травмацутхлнгин һардач Михаил Потолдыковин келсәр, травмацутхлнгд хаалһд зеткртә йовдлд шав авсн улст дөн күргнә. Энүнд түрүн медицинск дөн күргж болх, шишлн эмнүлһ кеж болна. Кергтә болхла операц кегднә. Интенсивн терапийин палатмуд бәәнә. Кемр күнд гемтә улст шишлнг дөн кергтә болхла эдниг Волгоград эс гиж Элст балһснд йовулж болх.
Травмацутхлнг секлһнд района бюджетас мөнг йилһж өггдв. Энүнә проектн-сметн документац белдлһнә төлә зун минһн арслнг һарһж өггдв. Тер мет района хазнас йилһж өгсн мөнгәр шин рентген-аппарат хулдж авгдв. Күнд шав авсн улсиг шинжлж хәләлһнә төлә иим аппарат цаглань болн чикәр шинжлт кенә. Дәкәд болхла федеральн шишлнг программар бачм чинртә медицинск дөн күргдг шин автомобиль хулдж авгдж. Арвн йисн сай арслнга шин оборудовань бас хулдж авгдсмн. Эннь анестезий кедг аппарат, өөшгд искусственн кевәр ки өглһнә, УЗИ-аппарат энд көдлжәнә. Хальмг танһчд иим дәкәд хойр цутхлнг көдлжәнә. Эннь Үстин болн Көтчнрә райодт бәәнә. Тер мет Элст балһснд бас иим цутхлнг әмтнд туслжана. Иим цутхлнгудт күнд шав авсн улст кергтә медицинск дөн күрггджәнә. Эмчнрин нилчәр кесг улс әмд үлдв.
Көкән Герл, Эрнжәнә Эрднь
