Танһчин предприятьмуд Пенсионн сангд зун далн йисн сай арслнг өртә
Элст балһсна предприять-организацс Пенсионн сангд зун далн йисн сай арслнг өртә. Эн төрәр пенсионн сангд болсн пресс-конференцд иим предприятьмуд болн арһлачнрин нерд заагдв. Зун минһн арслнгас үлү өрнд унсн предприятьмуд дунд хулд-гүүлгәнә, көлгн-күчнә болн туслмж күргдг организацс йовна.
Баһ цагтан иргч жирһлин ул тогтахла, медәрсн наснд амр болна. Энүнд көдлжәх улс Пенсионн сангд даатхлһна мөнг орулж өглһн иргчдән сән нилчән күргх. Болв танһчин кесг предприять-организац эврәннь даалһвран эн туст күцәжәхш. Пенсионн сангин көдләчнрин келсәр, эн халхар мана танһчд предприятьмуд диг-дара эвджәнә. Элст балһсна Пенсионн сангин заллтин ахлачин дарук Татьяна Мучкинован келсәр, кемр предприять эврәннь көдләчин тускар тооца эс орулж өгсн болхла, даатхлһна стаж бас уга болх. Тооцана кемжән бас хоосн болхмн. Пенсин кемжәг тоолж һарһдг мөнг уга болжана. Пенсионн сангин көдләчнр тер бийнь медәтнрт пенсь тоолһ һарһна. Зуг пенсьн бчикн болх. Тегәд улсин пенсин зөв эвдгджәнә гиж Мучкинова келнә.
Ода Элст балһсна хөрн нәәмн предприять ут-тоодан зун далн йисн сай асрлнг Пенсионн сангд өртә. Тер тоод Восточный нертә акционерн ниицән, “Энергосервис”, “Центральный ниицән” болн “Горводоканал” ик өрнд унв. Сүл кесг жилд эдн даатхлһна мөнг Пенсионн сангд орулж өгчәхш. Тегәд чигн эднә көдләчнрин иргч пенсьн кесг холванд баһрхмн. “Горводоканал” предпряитин директорин үүл дав зуур даажах Саглр Бивееван келсәр, мана предприятьд әмтн ик өртә. Тегәд бидн даатхлһна мөнг орулж өгч чаджахшвидн. Тер бийнь эн төриг бидн бүртклһнд авлавидн.
Пенсионн сангин специалистнр өртә предприятьмудын тускар танһчин һардврт зәнглв чигн, тендәс дөн иржәхш. Нег үлү, өрнд унсн предприятьмудын ахлачнр эднә неквриг күцәжәхш. Эврәннь финансин бәәдлиг чиклхин төлә болн эврәннь көдләчнрин иргч пенсин тускар ухалж, предприятьмудын һардачнр эн төриг эврә чанһ бүртклһнд авх зөвтә. Кемр тадн иргч пенсин төлә даатхлһан мөнг орулж өгсн тускар пенсионн сангас бичг эс авхла, эврәннь организацин бухгалтерьт одад, даатхлһна мөнг орулж өгх неквр тәвж чаджанат. Эврәннь иргчин тускар оданас авн ухалх кергтә. Пенсь ода социальн дөнцл мөнгн биш, эн мөнг жавлин ормд иржәх мөнгн болжана.
Санкун Кермн, Жамбин Дмитрий
