Танһчд хальмгин олн-әмтнә шүлгч Эрнжәнә Константина 100 жилин өөн өргнәр темдглжәнә
Эн өдрмүдт мана танһчд хальмгин олн-әмтнә шүлгч Эрнжәнә Константина зун жилин өөн өргнәр темдглжәнә. Целинн района Аршан булг селәнд болсн керг-үүлдврин йовудт цуглрсн әмтн бичәчин санлыг тодлад, энүнә жирһлин болн үүдәлтин халхс дәкнәс сергәж, дорас өсч йовх баһчудт келж өгв.
Эн өдрлә Аршан булг селәнд йоста нәр болв. Селәнүр ирсн гиичнриг хальмг улсин авьясар ду дуулж тосв. Эрнжәнә Констатина нер зүүжәх школд энүнә дегтрин һәәхүл бүрдәгдсмн. Сурһульчнр болхла бичәчин үүдәврмүдәр эврәннь зурсн зургуд үзүлв. Баһ наста билгтнр Константин Эрендженовичин шүлгүд умшв, дуд дуулв.
Константин Эрендженовичин бичсн үүдәврмүд хальмг улсин мөнк зөөр болжана. Эрендженов 50 һар дегтрмүд барас һарһв. Үг авч келсн улсин тоолврар, энүнә бичсн шүлгүд болн дуд төрскн һазртан нерәдж, теегин йиртмжин сән тоотнь темдглж бичдг бәәсмн.
19З1гч жилд «Песнь чабана» нертә энүнә түрүн дегтр барас һарв. Энүнд бичәч эврәннь жирһлин тускар бичв. Хойр жил давад Москвад болсн Советск союзин бичәчнрин түрүн сеьздт Константин Эрендженов Максим Горькийла харһв. Эн йовдл баһ наста шүлгчд сән урмд өгв. Зуг З7гч жилд цаажла харһулгж, Колымд 20 жилдән бәрәнд бәәсмн.
Ирсн гиичнр хальмгин бичәчин тускар тодлврмударн хувалцв. Эн зурхач болсн деерән, төвдин медицин сәәнәр меддг билә. Теегт урһсн ноһана тускар цуг тоот меддг билә. Үлгүрлхд, урһмлын нердиг болн үнриг йилһрдг билә. Дәкәд болхла һартан эвтә Константин Эрендженович арсас олн зүсн кегдлмүд эд бод кеж һарһдг билә. Цуг медсн тоотан хальмг улсин амн үгин зөөрт нерәдгдсн «Алтн булг» нертә дегтртән бичв.
Эн харһлтд шүлгчин күүкнь Светлана Докурова бас орлцв. Энүнә келсәр, эцкнь йир төвкнүн, цаһан саната, төрскнч күн билә.
«hалан хадһл» роман бичәд, Советск Союзин герой Эрднь Деликовин нертә мөрәһәр ачлгдв. Жанһр дуулвриг сәәнәр медж дуулдг бәәсмн, тер мет эврәннь шүлгүдтән ду орулж бичдг бәәсмн. Эн керг-үүлдврт орлцсн улсин темдглсәр, Эренжәнә Константина тускар олн бүлән үг келж болжана. Бичкнднь энүг нег һазра улс ботхн гиж энкрлж дуудг билә. Зуг энүнәс өсәд, чидлтә теегин һәрд хүврәд, хальмг литературин ууһн шүлгчин тоод орв.
Ээнән Дельгр, Очра Сергей
