Тамбов балһсна театр Хальмгт ирв
Сурһульчнрин амрлһна өдрмүдт көвүд-күүкд соньн тууляр тәвсн наадд хәләж чадх. Эн өдрмүдт Элст балһснд Тамбовск драматическ театр эврәннь наадан үзүлжәнә. Октябрь сард шог наадна болн драмин орсин театр Тамбов балһснд эврәннь хамгин сән наадд үзүлсн билә. Тамбовин театр Хальмгт долан наад үзүлх, тер тоод “Ну, Волк, погоди” нертә көгжмин тууль хәләж болх.
Хамгин нертә болн олнд таасгдсн Әрәсән “Ну, погоди” мультфильм театрт тәвгдв. Иим наадн телевизионн фильмлә дүнцүлж болшго. Энүнд чөнын, туулан болн талдан чигн туулин дүрмүд тас талданар үзүлгджәнә. Курляндскийн бичсн наадыг Тамбовск драматическ театрин актермуд үзүлв. Наадна һол нег дүриг туулан дүриг баһ наста артистк Ольга Сирото нааджана. Иим дүр актрист таасгдв. Бичкн цаган дәкәд не тодлад, альвлж болх гиж Ольга келнә.
Тамбовск драматическ театрин артистк Ольга Сирото келсәр, иим туульд наадхдан дурта. Актермуд үүдәлтин байр болна. Дәкнәс бичкн цагиг тодлж болна.
Чөнын дүриг Александр Архипенков нааджана. Эн дүриг актер бичкдүдин цуг нааднд нааддг болв. Наадна йовудт чөн цаһан седклтә болв чигн, оньдин өлн болна. Дангин сән хот-хол идхәр ухална. Хамгин түрүнд ээжинь идхәр седнә, дарунь Улан махлата күүк идх саната. Аштнь туулаг идхәр зурална. Болв чонын зура күцхш. Энүнә хаалһд олмһа туула харһад, чидл уга ангудыг харсж авна.
Тамбовск драматическ театрин актер Александр Архипенковин келсәр, чон гисн олн таасгдшго дүр болжана. Эн нааднд чоныг талдан сән халхаснь үзүлхәр зүткнә. Чоныг харм болна. Энүнд туула чоынг көөлдәд зована.
Гиичнрин үзүлсн наадн өдгә цагин тууль. Энүнд дүрмүд хоорндан баһчудын келәр күүнднә. Наадна йовудт актермуд хәләһәчнрлә хәрлцә бәрж күүнднә. Наадн болжасн кемд бичкдүд альдас әәмшг учржахин тускар туулад келж өгнә.
Театрин үзүлсн тууль иньглтин, цаһан седклин тускар келж өгчәнә. Энүнд баатр-зөрмг кевәр бәәж, талдан улст нөкд болх, иньглт яһж бәрхин тускар сурһмж өгчәнә. Наадна йовудт көвүд-күүкд олн олз-туста селвгүд авч чадв. Тер мет “Красная шапочка”, “Волк и семеро козлят”, “Три поросенка” нертә дурта ьуульсан дәкәд нег сергәж авч чадв. Бичкдүдт наадн икәр таасгдв.
Нанд долан ямана ишк таасгдв гиж эн келнә. Нанд болхла туула хамгин икәр таасгдв гиж эн темдглв. Энүнә келсәр, хамгин икәр чон таасгдж. Энүнә тускар мультфильм хәләж. Тенд чон турвад унснь таасгдв.
Хальмг танһчд Тамбовск драматическ театр түрүн болж иржәнә. Эдн нааран хамгин әсн гисн наадан авч ирв. Ут-тоодан олн-зүсн учр-утхта долан наад үзүлх. Иим наадд театрин репертуарин аш тогтажана. Ода театр орсин нертә бичәчнрин үүдәврмүд тәвнә, өдгә цагин драматургин наад үзүлнә.
Тамбовск драматическ театрин директор Петр Куликовин келсәр, Театрин артистнр "Незамужняя женшина" наад үзүлх. Лев Корсунскийн бичсн наадыг олн улс сәәнәр меднә. Энүнд күүкд күн эврәннь өрәлән хәәһәд, һанцхарн бәәхәр седхш. Тер мет баһ наста хәләһәчнрин төлә америкин драмамтург Мил Саймона бичсн "Дураки" нертә наад авч ирж.
Тамбовск драматическ театр Элст балһснд эн долан хонгин чилгч күртл бәәх. Наад хойр плошадкд үзүлгдх — государственн концертн залд болн шог наадна болн драмин орсин театрт эднә наад хәләж болх. Тегәд хальмгин хәләһәчнр Әрәсән хамгин хуучн театрин билг-эрдмлә өөрхн таньлдж чадх.
Көкән Герл, Хулхачин Николай
