Төрскн келнә нарта-делкән өдрт нерәдсн семинармуд болх
Манһдур төрскн келнә нарта-делкән өдр. Эн өдр арвн һар жил хооран келнә болн сойлын туст дөн күрглһнә төлә экләд темдглддг болв. Хальмг танһчин сурһулин заведеньст төрскн келнә өдрт ик урдаснь белдвр кегднә, олн — зүсн керг-үүлдврмүд, тер тоод марһас, харһлтс хальмг келәр бүрдәгднә. Бичкн цагасн авн бичкдүдт эк эцкнр хальмг кел заах зөвтә гиж Хальмгин олн әмтнә шүлгч Шугран Вера тоолжана.
Бичкдүдт хальмг кел дасхлһнд ик нилчән сурһмжлачнр болн хальмг келнә багшнр күргжәнә. Эндр өдр бидн хоорндан хальмгар күүндх зөвтәвидн, мана өвкнриннь келиг мартж болшго, цуг арһ жидлән агсж мана уул хальмг келнә делгрүлһнд хамдан орлцх зөвтәвидн, күн болһн эврәннь тәвцән орулхла мана келн бөкшго гиж сангдна.
Эн өдрмүдт мана танчһд Хальмгин олн-әмтнә бичәч Балакан Алексейин найн тавн жилин өөн темдглгджәнә. Элст балһснд кесг жилдән бичәч бәәршлсн герин эрст эндр Балакан Алексейин өрк-бүлин, хотл балһсна мэрийн болн бичәчнрин ниицәнә седвәрәр мемориальн самбр углж тәвгдв. Самбр секлһнд бичәчин өөрхн улс, элгн-саднь, багшнр, сурһульчнр болн шүлгчиг сәәнәр медж йовсн улс орлцв.
