Тәмк татлһнла ноолдан кегджәнә

Бичкн ларекмудт болн киоскмудт пиив хулдшго закана хөөн, ода тәмк татдг му авяьсан хайх селвг Әрәсән әмтнд өггджәнә. Цөн сар болад шин закан үүлдврт орх. Энүгәр олна һазрт тәмк татшго зокал чанһржана. Үлгүрнь, эрдм-сурһулин, сойлын, спортын болн государственн учрежденьст, лифтмудт болн давшурин плошадкст тәмк татж болшго. Июнин нег шинәс авн зуг һаза эс гиж гертән тәмк татж болх. Тер мет жил болһн тәмкин үн өсх.

Июнин нег шинәс авн тәмк зуг гертән эс гиж һаза татж болх. Шин закаһар эрдм-сурһулин, спортын болн государственн учрежденьст тәмк татж болшго. Тер мет гермүдин подьездмудт, бичкдүин болн давшурин плошадкст бас тәмк татшго зокал һарв. Тер мет жил болһн тәмкин үн өсх. Сигарет-папиросмудыг ода магазина витринд тәвх зөв уга. Иим кемәр тәмклә ноолда кехлә, әмтн му авьясан хайх аль угай? Энүнә тускар элстихн нег мөслгч тоолвр уга. Хөрн жилдән тәмн татжах Санан Музаевин тоолврар, тәмкин үнрт дасж одв, тегәд ямран чион закан тәмкән хайхд боомтг болшго. Эннь му даслт болж одв. Санан Музаевин келсәр, урдк кевәр тәмк татх. Зуг альд татхан медх кергтә.

Элст балһсна бәәрн күүкд күн Гиляна Цебекова бас иим тоолврта бәәнә. Энүнә эцкнь кесг жилдән тәмк татжана. Иим му авьясла өрк-бүләрн ноолдж. Болв эцкнь ода күртл тәмкән хаяд уга. Ода давшурин плошадкт тхәмк татдган хаяд, балкон деер татдг болв.

Тәмкин үнр талдан улст му нилчән күргшо, гертән тәмк татшго закан уга гиж эн келнә. Элст балһсна әмтн дунд тәмк татдго улс бас харһна. Владимир Омельчакин келсәр, арвн жил хооран тәмк татдган хайв. Эк-эцкнрнь иим му авьяс хайхд сән нилчән күргв. Энүнә тоолврар, иим төриг нег өдрин, нег жилин эргцд хаһлж болшго. Сурһульчнр школд, оютнр, баһчуд тәмкән хайх зөвтә. Эврәннь эрүл-мендән күн болһн эврән харх зөвтә.

Хальмгин олн-әмтнә хуралын ахлачин дарук Хонһр Эльбиковин тоолврар, кесг дәкж тәмкән хайхар седсн улст шин федеральн закан дөн болх. Иим закан күцәгдхлә, тәмк татдг улсин то зөвәр баһрх. Хуралын ахлачин дарук Хонһр Эльбиковин келсәр, од мана танһчд бөдүн цуг улсин жирн тавн процентнь тәмк татна. Эднәс арвн зурһан наснас ах һучн тавн процентнь тәмк татжана. Эннь ик чинртә төр. Иим закан чик. Эрүл-дорул кевәр бәәлһнә авьяс тархах кергтә. Тәмк татхла, зүркнә гем ирнә. Талдан чигн хорлтан күргнә.

Шин закан үүлдврт орулгдхла, әмтн баһра ирдг болх гиж сөөһәр көдлдг ресторан-кафен эздүд үүмжәнә. Элст балһсна нег кафен администратор Сяха Сармуткина келсәр, үвлин кемд һаза һарад тәмк татхд күнд болх. Энүнә келсәр, организацд тәмк татдг улсин төлә салу хора йилһж өгх кергтә. Тиигхлә тәмкин утан талдан улст күршго. Тәмк татдг улст салу хора кергтә, тәмк татдго улст салу хора бәәх зөвтә.

Шин закан тәмк татдг улст чанһ неквр тәвжәнә. Тер мет тәмк татдго улс тәмкин үнр киилшго. Шин закан һарсн хөөн, му авьясан хайх ухан серл орх гисн ицл бәәнә. Жил болһн тәмкәс көлтә кесг минһн күн өнгрнә.

Ээнән Ольга, Ирчин Алексей