Сөөһәр хөрн һурвн часас авн шууга татлго әмтнә төвкнүн бәәдлгиг эвдлго бәәлһнә зака күцәх кергтә

Сөөһәр хөрн һурвн часас авн шууга татлго әмтнә төвкнүн бәәдлгиг эвдлго бәәлһнә зака күцәх кергтә. Дигтә тиим зака Хальмг Танһчд хойр сар хооран ьатлсн билә. Болв эн зака эвдсн йовдл дангин һарна.

Элст балһсна Юрий Клыковин нер зүүжәх уульциг олн әмтн меднә. Дигтә эн уульцд кесг кафе, ресторанмуд асхн цагасн авн өрцәтл күртл көдлнә. Энүнд асхн болһн шууган, аля азд һарһжах улсин йовдл үзж болхмн.

Медәтә улс тиим ик шууганас нөөрн күрхш. Арһ уга болад эдн асхн болһн полицин көдләчнриг дуудна. Зәрмдән эдн ирхш. Аля азд һарһжах улс мадниг му чигн келнә, ноолдах чигн дәврнә — гиж медәтнр зовлнгарн хувалцв.

Сөөһәр арвн һурвн часас авн шууга татлго әмтнә төвкнүн бәәдлгиг эвдлго бәәлһнә зака күцәх кергтә. Дигтә тиим зака Хальмг Танһчд хойр сар хооран авгдла. Болв эн закаһар нертә уульнцин кафе ресторанмудын эздүд бәәхәр седхш.

Ик шууган асхн болһн мах шаржах Петр арһлачиг бас зована. Ик шууганас әмтнә келсн угнь сонсч чадлго, дангин хәәкрх кергтә. Батлж авсн зака көдлжәхш, медәтә улс ик зовлн эдлжәнә гиж Петр маднд келв.

Сөөһәр аля азд һарһжах улсиг эндр өдр ялд унһах кергтә. Кафе ресторанмуд бәржәх арһлачнр дууһан невчкн баһчурл зөвтә. Болв энүнлә ноолда кехд йир күнд болх. Эн тускар ноолда кехин өмн кесг эрлһ бичәд, цаасн белдх кергтә, эн цааснд кесг әмтн һаран тәвх зөвтә.

Хальмг Танһчин дотр дундын министерствин олн әмтнә төвкнүн бәәдл тетклһнә әнгин ахлачин дарукин үүл күцәжәх Сарнга Баатрин келсәр эндр өдр күн болһниг ик шууган зовахла эрлһ бичх зөвтә. Түүнә хөөн полицин көдләчнр бүртллһнә көдлмшиг давулж чаджана.

Хойр сар хооран авгдсн закана ашт әмтнәс хойр эрлһ бәәнә. Эндр өдр әмтнд сул цаг уга, өдрәр кесгнь көдлнә, асхар болхла тиим ноолда эврә арһар кецәж болшго.

Саглара Манджикован келсәр эндр өдр тиим улсиг ялд унһах кергтә, ялын кемжән олн улст хойр минһн арслн күрнә. Арһлачнр болхла тавн минһн арслн ялын мөнгн өгх зөвтә.

Тиигәд күн болһн эврә сул цаган бийдән тааста кевәр давулж чаджана. Болв хам хоша бәәх улсин төвкнүн бәәдлд харш күрглго бәәх зөвтә.

Дмитрин Татьяна, Жамбин Дмитрий