Сүл цагт хальмг танһчин әмтн өвкнриннь һазр-ус тәклһнә хуучн авьяс күцәгддг болв

Сүл цагт хальмг танһчин әмтн өвкнриннь һазр-ус тәклһнә хуучн авьяс күцәгддг болв. Иим зангшал мана келн-улсин сойлын ик чинртә халх болжана. Иим кевәр хальмг улсин уул авьяс-зангшал сергәж босхгджана. Тер мет иим керг-үүлдвр олн улсин нас уттулдг зангшал болжана.

Мана хол урдкс кесг зун жилмүдин урд, хол Зүнгар һазрар һарад, Әрәсән межа һатлад, у-урсхллта Ижл һолын көвәд нүүж ирәд, дөрвн зун жил шаху бәәршлжана. Ижл мөрн көвәһәс авн Тенһ һол күртл дөрвн зүсн малан идшлүләд, нүүдлин бәәдләр бәәдг билә. Эн кесг жилмүдин эргцд Әрәсәд болсн дән дажг болһнд әмән хармнллго Әрәсән межәг харсж йовла. Улан Залата хальмг улсин туужд кесг байр, зовлнгта йовдл чигн харһла. 194З жилд хальмг улсиг хар гөрәр цаажла харһулад төрскн һазрасн салһад киитн Сиврин һазрар тараһад Хальмг Танһчиг уга кесмн. 1З жилдән киитн Сиврт араһан зу бәәж кесг түрү зүдү үзәд, хәрү Төрскн һазрур хәрж ирхлә, кезәнә хальмгуд бәәсн һазриг хам хош бәәсн областяр тараһад хайчксмн.

Тегәд, Улан Хальмг нертә селәнә тууж йир соньн. Эн бичкн селәнд олн гермүд билә, әмтн йир көдлмшч улс бәәсмн, энд өдр эн һазр дорас өсч йовх баһчудт соньн болсн деерән мана хальмг танһчин бүкл әрәсән туужд зөвтә орман эзлжана келхлә буру болшго.

Жил болһн эн ик чинртә мөргүлиг Үрс сарла ирлцүлж давулна, эн керг үүлдврт түнктин әтәснә арвна әәмгәс олн өрк-бүлмүд орлцсмн. Түрүләд эдн хагсу мод авад һалан шатаһад, семжнд оралчксн чансн хөөнә толһаг, хойр шиир һалд хайдмн, цааранднь күн болһн шар тос, кампать балта, тутрһ, үс, һуйр авад зөв эргүләд һалд хаяд зальврдмн. Эжгәрәд өнчрсн теегтән әмдрл өгч, чеежнь цевр аһаһар дүүрч, күн болһна седклнь амрулсмн.

Царанднь эдн әмтәхн хотан ууһад, йөрәл тәвәд, дууһан дуулад бииһән бииләд байрлцхана. Күн болһн һазр уснаннь, унг тохминь туужан медх хөвтә. Юнгад гихлә урдг угаһар иргч уга болдмн. Эн учрар икчүднь баһчудтан үзссән, сонсан чеежәсн һарһад келәд бәәхлә, үйнрин залһлдан кезә чигн тасршго.

Аджин Светлана, Жамбин Дмитрий