Спортивн бииһин марһан болв
Ке-сәәхн болн спорт. Биид дурта баһчуд цогц-махмудын чидлиг болн искусствиг негдүлв. Энүнд Хальмг танһчин секәтә марһанд орлцачнр герч болв. Элст балһсна клубмудын гешүд болн хам-хоша бәәх регионмудын коллективмуд эврәннь билг-эрдмән үзүлв. Ут-тоодан һурвн зун бичкдүд диилвр бәрхәр зүткв.
Арһул вальс, бразилин самба, кубинск ча-ча-ча. Хәләһәчнр залын тал дунд биилжәх улсиг нүдән авлго хәләв. Марһанд орлцачнр би болһниг йилһән сәәнәр үзүлв.
Спортивн бииһин Хальмг танһчин секәтә чемпионат зурһан жил дарандан болжана. Энүнд оньдин хам-хоша бәәх регионмудын спортсменмүд ирж орлцна. Эн жил марһан дөрвн насни багар бүрдәгдв. Бичкдүд онц бииһин болн хошадар биилдг дөрлдәнд дииләчән йилһв. Йисн наста Баина Тюрбеева иим марһанд урднь чигн орлцдг билә. Тер бийнь үүмәд бәәв гиж уйн наста спортсменк келнә.
Баина онц бииһин марһанд орлцв. Эн күүкн спортвн бииһәр хойр жилдән соньмсжана. Баина Тюрбееван келсәр, долан настаһасн авн бииһин клубд оржана. Хойр жилдән би биилдг дасжана. Би йир таасгджана. Сул цагтан биилхдән дурта.
Спортивн би искусств эс гиж спорт? Эн сурврт күн хәүр өгч чаджахш. Нег халхаснь спортивн би — искусств болжана. Юнгад гихлә әмтн өдр болһн гилтә би дасж авна. Талдан халхаснь эннь спорт болжана, яһад гихлә, кесг цагтан белдвр кесн хөөн, эдн марһанд орлцна.
Хальмг танһчин спортивн бииһин федерацин вице-президент Надежда Эльдяева келсәр, марһанд Хальмгин спортивн бииһин федерацин элчнр, Волгоград, Әәдрхн болн Ставрополь балһсдын спортсменмүд орлцжана. Спортивн бииһәр соньмсжах бичкдүдин цогц-махмуднь батрна.
Бииһин клубын тренер Роман Лежаев марһанд эврәннь бичкн биичнрән дахулж ирв. Эдн цугтан призермудын тоод орв гиж багшнь бахмжтаһар келнә. Эднә клубд спортивн биилә зерг хальмг улсин би, хип-хоп би болн талдан чигн эрдм бичкдүдт дасхжана.
Бииһин клубын тренер Роман Лежаевин келсәр, көвүд-күүкд сәәнәр дөрлдв. Эдн невчк үүмәд бәәв. Түрүн болж иим марһанд орлхд күнд болна. Эдн цугтан сән үзмж бәрв. Мана танһчд спортивн би делгрлт сәәнәр авад уга. Ода эн спортыг тархажанавидн. Талдан балһсдас багшнриг, тренермудыг дуудж авнавидн.
Секәтә марһана цуг диилчәнр болн призермуд күндлһнә һашгудар болн дипломар ачлгдв.
Шаран Баира, Хавтхна Анатолий
