Сойлын Олимпиадын фестивальд Хальмгин Аллегро ансамбль орлцв
“Сочи 2014” нертә сойлын Олимпиадын Әрәсән регионмудын хойрдгч марафонд Хальмг танһчин Аллегро көгжмин ансамбль орлцв. Ода форум дегц Сочи болн Лондон балһснд болжана. Энүнд Әрәсән далн региона үүдәгч коллектив олн-зүсн соньн программ үзүлжәнә.
“Аллегро” нертә көгжмин ансамблин артистнр этоноакадемическ үүдәврмүд дуулад, Сочи балһсна улсиг болн Хар тенгсин балһсна гиичнриг икәр өврүлв. Мана танһчин коллектив олн улс ссәнәр меддг зевсгүд олзлсн деерән, хальмг улсин өвәрц Мөрн хур зевсг үзүлв.
Эн зевсгин көгжм олн улст соньн болсн лавта. Фестивальд әрәсән олн регионмудын элчнр ирж орлцв. Үүдәгч коллектив болһн эврәннь келн-улсин сойлла болн зангшалла цуглрсн әмтиг таньлдулв. “Аллегро” ансамблин дуучнрин художествен һардач Савр Катаевин келсәр, нег программар көдлжәхш. Оньдин репуртуаран сольжана. Концерт болһн академическ көгжм сонсслх зура бәәнә. Иим көгжм олнд таасгдна. Энд болхла һаза этноакадемическ үүдәврмүд үзүлхд сән таал бәәнә. Хальмгини сойлла олн улс таньлдх арһ бәәнә.
Ансамблин репертуарт хөрдгч болн хөрн негдгч зун жилмүдин композитормудын көгжм һол орм эзлжәнә. Тер мет эдн эврәннь концертн программд өдгә цагин айлһар хальмг улсин көгжм болн хальмгин композитормудын үүдәврмүд орулж олна оньгт тусхав. Сочи балһсна хәләһәчнр олн зевсгудин көгжм сонсад, чикнә хужран ханһав. “Аллегро” ансамблин дууч Светлана Катаеван келсәр, коллектив соньн көгжм татна. Классическ көгжмиг еддго улст иим үүдәврмүд таасгдх. Тер мет хальмг болн монһл улсин көгжм программдан орулж. Би болхла мана танһчин ууһн композитор петр Чонкушовин үүдәсн Харада ду дуулжанав гиж Светлана Катаева келнә.
Хар тенгсин көвәд болсн фестивальд хальмгин Аллегро ансамбль билг-эрдмәрн кесг зун әмт байрлулв. Тер мет Әрәсән талдан чигн регионмудын улс мана танһчин көгжмлә өөрхн таньлдж чадв. Әрәсән регионмудын марафон Олимпиадын сойлын көгжмин жилин һол керг-үүлдвр болв. Сочи балһснд иим фестиваль тенгсин хулд-гүүлгәнх портын тавлнгд болв. Лондон балһснд болхла иим марафон Кенсингтонск садмудт болжана. Сойлын олимпиад августын арвн хойрла төгсхмн.
Бевина Мергн
