Собиновин нертә государственн консерваторин театральн институт төгсәжәх оютнр Элст балһснд билг-эрдмән үзүлх
Әрәсән хамгин нертә театральн деед сурһулин негнь Собиновин нертә государственн консерваторь төгсәжәх оютнр Элст балһснд билг-эрдмән үзүлх. Эн байр хальмг танһчин драмин болн шог наадна осрин театрт болх. Энүг бүрдәһәчнр Әрәсән театральн иргч гиж нерәдв.
hурвн хонгин туршарт Элстин улс болн гиичнр һурвн тас әдл биш наад үзж чадх.Дөрвдгч курсын хөрн нег ноют цугтан нааднд орлцжана.Түрүн наадыг эднә һардач Игорь болн Любовь Баголей шүүж авсмн.Эннь Англин зокьялчин үүдәсн «Лейтенант с острова Инишмор» нертә өдгә цагин наадн. Энүг бичсн Маттин Мак-Донах эврәннь үүдәвртән өдгәцагин бәәдл-жирһлин тускар, шагшавдын төрәр хуа тунһаж, күн болн цецн болх зөвтә гиж бичжәнә.
Эн нааднд көгжм дала, артистнр бииләд, шуугата нәр кенә. Талдан театрмуд авч ирдг нааднас оютнрин үзүлх наадн соньн болсн деерән, наадна үүлдвр генткн соляд, тас талдан зураһар болна.Эврәннь көдлмшән режиссермуд болн артистнр дуран өгч кежәнә.Элстин хәләһәчнр болн гиичнр шин актермудыг үзхд соньн болх. Саратовск консерваторин театральн институтын багш Любовь Баголей келсәр, оютнр тас шин өдгә цагин наад тәвжәнә.Энүг бичсн зокьялчла, энүнд үзүлгджәх дүрмүдлә бидн ямаран өөрхн бәәхинь үзүлхәр седләвидн.
«Лейтанант с острова Инишмор» нертә нааднас баһ наста артистнр Александр Галина бичсн «Звезды на утреннем небе» нертә драмин тууж болн «Сонеты Шекспира» нертә драмин балет үзүлхмн. Танһчин орсин театрин һардвр иим шин седвәрәр дала сән тоот күләжәнә. Драмин болн шог наадна орсин театрин директор Валерий Хотлина келсәр, эн фестиваль төгсхлә, баһ наста артистнрин коллективмудыг дууж авхин тускар шиидвр авхвидн.
Өдгә цагт Әрәсәд театральн бирж уга. Тегәд чигн Әрәсән регионмудт бәәх театрмудт артистнр күртжәхш. Элст балһснд болх «Әрәсән театральн иргч» нертә фестивалин һол күцлнь — соньн болн билгтә артистнр эврәннь режиссерла харһад, үүдәлтин хаалһд орхд тус күрглһн болжана. Тегәд Саратовск государственн консерваторин театральн институт төгсәжәх оютнр иргчдән Элстин театрмудт билг-эрдмәрн олн улсиг байрлулх ицл бәәнә.
Хавтхна Элла, Хулхачин Николай
