Шишлнг машидт жолачнр яһж хаалһ өгчәхин тускар бүртклһн кегдв
Нөкд болхин төлә хаалһ өг. Элст балһснд түүмр унтралһна церглтин көдләчнр ГИББД-н инспектормудла хамдан автомобилистнр шишлнг машидт яһж хаалһ өгчәхин тускар бүртклһ кежәнә.
Элст балһсна цутхлнг уульнцар герл гилвксн түүмр унтрадг машин нааран-цааран гүүлгв. Иим докья сонссн маши залачнр тер даурнь шишлнг автомобильд хаалһ һарһж өгв. ГИБДД-н көдләчнрин келсәр, зәрмдән шинкн экләдл маши залж йовх күн иим бачм чинртә бәәдлд оньган өгхш. Шишлнг машин боомтг угаһар цаглань кергтә һазрт ирхлә, әмтн харсж авгдх, тегәд минут болһн ик чинр зүүнә. Эн жолачин келсәр, шишлнг көлгн-күчнд хаалһ оньдин өгнә. Күнд бәәдлд туссн улст дөн күргнә. Иим машидт хаалһ өгх кергтә. Эн маши залачин тоолврар, хаалһ иим машидт эрк биш өгх кергтә. Иим кевәр бидн талдан улст дөн күргжәнәвидн.
МЧС-ин региональн заллтин көдләчнрин келсәр, сүл цагт жолачнр дигтә-дарата болв. Шишлнг көлгн-күчнд хаалһ эс өгхлә, эдн чанһ засгла харһулгдхин тускар меднә. МЧС-ин ах специалист Павел Сабельниковин келсәр, бачм чинртә церглтин машид цаглань кергтә һазрт ирхлә, иим церглтин көдлмшин чинрнь сән болна. Зуг зәрмдән иим һазрт цаглань күрхин төлә зууран олн боомтг давж һарх кергтә болна. Хамгин ик харшлтнь — хаалһд дегд олн машид харһна. Сүл жилмүдт көлгн-күчнә то дегд икәр өсәд йовна. Зәрмдән кергтә һазрт шишлнг машид күчр чадхш. Эзнә машид хаалһ бөгләд, зәрмнь әмтн йовдг хаалһд автомобилян үлдәнә. Тер мет олн давхрта гермүдт бәәх улс хаалһ эврән хаачкна.
МЧС-ин түүмр унтралһна әнгин специалист Павел Сабельниковин келсәр, иим рейд ГИБДД-н көдләчнрлә хамдан кегднә. Энүнә йовудт жолачнр яһж шишлнг көлгн-күчнд хаалһ өгдгинь медж авгдна. Түүмр шатжасн һазрт шишлнг машид харслһна көдлмш кехин төлә боомтг угаһар күрх зөвтә. Арвн минутын эргд иим машид кергтә һазрт күрх неквр бәәнә. Госавтоинспекцла хамдан иим рейд кех кергтә.
Келхд, давсн жилд эн халхар нег чигн протокол бичгдсн уга. Ода кегдсн керг-үүлдврин ашнь апрель сарин чилгчәр диглгдх. Энүнә ашар мана хотл балһснд шишлнг машинд кедү жолач хаалһ эс өгсн тускар ил медгдх.
Ээнән Ольга, Колдан Церн
