Шин жилин байрин елк кедү күрчәнә?

Шин жилин байр күртл долан өдр үлдв. Олн улсин хамгин дурта байр өөрдх дутм Әрәсән улс эврәннь герән кеерүлж, шин жилин байрин сергмжтәһәр тосхар зүткжәнә. Ода елк дундлад һурвн-дөрвн зун арслнг күрчәнә. Болв зәрм әмтн Элстин захд бәәх урһа модна ө-шүһүд одад харһа мод көрәдж авчана.

Элст балһсна захд елочн базр декабрин дундурас авн көдлжәнә. Нааран эд-тавриг ик “КамАЗ” машиһар авч ирнә. Энд шин жилин байрин олн-зүсн һол темдг хулдж авч болх.

Ода ноһан урһмл модыг хулдачнрин келсәр, Пензенск тимоникас авч ирж хулджана. Эдниг шишлнг кеәвр шин жилин байрла гертә лек кеерүлхин улсин төлә урһажана. Магазидт болхла олн-зүсн өнгтә болн кемжәтә искусственн елк хулдж авч болх. Эн кемд жил болһн Элстин лесничествин көдләчнр чанһ неквртәһәр көдлнә. Шин жилин байрин өмн өргнд жил болһн Элстин әмтн энүнд харһа мод көрәдж авна. Энд түрүн крымск харһа модн далн хойрдгч жилд суулһгдсн билә. Түрүләд хойр гектар аһуд модн тәргдв. Ода Элстин хар модна аһу дөчн гектар эзлжәнә. Ода урһа модна ө-шуһуд туула, арат болн чөн чигн бәәнә. Сүл дәкж урһа мод энд хойр минһн негдгч жилд суулһсмн. Тер цагас авн энүнд шин модн тәргдәд уга. Жил ирвәс урһа модна то баһрад йовна. Ода әмтн машиһар ирәд модн көрәдж хулхална. лайф лесничествин көдләчин келсәр, эн хар модн хойр минһн негдгч жилд тәргдлә. Йосндан урһхин төлә арвн хойр кергтә.

Лидия Гучинова Элстин лесничествин заллтд дөчн хойр жил хооран баһ наста специалист болж ирж көдлв. Талдан көдләчнрлә хамдан урһа мод тәрв. Эн көдлмшиг седклән өгәд күцәв. Лидия Гучинова елк болһна туужин тускар келж өгч чадх. Кезә тәрсинь, энүнә урһмлд юн боомтг болсн тускар меднә. Мөнгн ховр болад үвлин кемд болн зунын цагт урһа модыг зуг нен күн харж хәләжәнә. Сергей Алексеев насни туршарт эн ке-сәәхн мод хәләж харсжана. Энүнд хог-бог ахулна, һал унтрана, хагсу бүчринь көрәднә. Браконьермудла ноолда кех зөв уга.

Сергей Алексеевин келсәр, зурһан-долан мод көрәдж авснь үзгднә. Эннь зуг эн һазрт илткгдв.

Декабрин арвн тавнас авн энд Аршан поселкин участкин полицин көдләчнр харж хәләжәнә. Келхд, урһа мод көрәдж авхла засгла харһулгдхин утскар зәрм әмтн меджәхш. Эгл улс һурвн минһн арслнг ялд унх закан бәәнә. Физическ әмтн зун тәвн минһн арслнг ял өгх зөвтә. Иим ял модна өндрәс иштә авгдна. Тавн минһн арслнг һару һарһсн цагт хойр зун минһн арслнг ял өгх кергтә, эс гиж нег жиләс авн зурһан жилдән түүрмд суух закан бәәнә.

Хавтхна Элла, Хулхачин Николай