Шар харһа модна ө-шуһуг кен хәләж харсхмн?
Шар харһан ө-шуһу модн кенд кергтәв? Дөчн жилд Элст балһсна эргндкг көк урһа модн кеерүлжәнә. Түрүн авгтан энд хойр гектар ө-шуһу модн бәәсмн. Ода модна то өсәд дөчн гектарт күрв. Жил ирхвс ке-сәәхн модн урһг һазр му бәәдлд тусжана. Юнгад гихлә энд кесг жилдән эзн уга болжана. Кен энүг хәләж хархмн?
Элст балһсна деед-өмн үзгт далдгч жилд Хальмг танһчд ор һанцхн шар харһа модна ө-шуһу тәргдсмн. Ода энүнә аһу дөчн гектар тогтажана. Урднь энүнд йиртмжин бумбин чинр зүүлһсн билә, зуг йирн нәәмдгч жилд государственн урһа модна сангас һарһгдад, иим чинрән геев. Тер цагас авн арвн жилин туршарт күсдундур шар харһа модн эзн уга үлдв. Элст балһсна экологин әнгин һардач Татьяна Пасечникован келсәр, ода эн һазр Элст балһсна медлд оржахш, танһчин зөөр гиж темдглгдж бичгдсн уга. Энүнә һазрин межәг салһад уга. Энүнә тускар мана танһч заквр батлж авх зөвтә. Энүг һазрин министерств күцәх даалһврта. Балһсн арһ-чидләрн хәләж харжана. Эн төр ода күртл хаһлгдад уга, кезә энүг хаһлхнь медгджәхш.
Зунын кемд ик һан халун болхла шар харһа модн хагсад үрх эс гиж түүмрт шатх әәмшгтә, үвлднь болхла энүг браконьермуд хулхалж авна. Эдниг ода зуг нег көдләч харсж хәләжәнә. Болв иим ик аһуд ор һацхн күүнд бүртклһ кехд күнд болжана. Сүл дәкж нааран шин урһмл арвн жил хооран авч ирсмн. Сүл жилмүдт шар харһа ө-шуһу хәләж хархин төлә мөнгн тас йилһж өггджәхш. “Элистинское лесничество” нертә учрежденя директор Бадма Насуновин келсәр, шар урһа модна ө-шуһуг дәкнәс лесничествин медлд өгхин тускар йиртмжин министерствд бичг бичсн бәәж. Тиигхлә бидн энүг хәләж харсж чадхвидн. Болв ода эн һазр лесничествин медлд орад уга. Тегәд ода зуг бооцаһар мөнгн бәәхлә харслһна көдлмш кегднә.
Урһа модна халхин специалистнр шар харһа модыг күүнд төвкнүн бәәдл теткдг модн гиж нерәднә. Эдн эврә дурар жалв авлго урһа мод хәләж харсжана. Ода күртл шар харһа модна ө-шуһу эс шатснь болн хог бог асхдг һазрт эс хүврснь иим көдләчнрин нилч болжана. Бадма Насуновин келсәр, ода эн һазрт ямаран чигн көдлмш кегджәхш. Аршань поселкд бәәх полицин көдләчнр хая-хая эргәд хәләнә. Эврәннь седвәрәр шишлнг көдләчиг йилһж өгнәвидн. Шин жилин байрин өмн өргнд хойр долан хонгтан эн күн урһа мод хәләж харна.
Арвн тавн жилдән Элст балһсна һардачнр болн йиртмжин көрнгин министерствин элчнр ке-сәәхн көк урһмл модна ө-шуһу кен хәләж хархинь йилһж авч чаджахш. Эднә тоолврар, эн һазриг дәкнәс государственн урһа модна сангин медлд эс орулхла, бәәдл ясршго. Тер саамд жил ирвәс көк урһмлын бәәрн му дүрстә һазрт хүвржәнә. Тегәд альдас дөн күләхнь ода деерән медгджәхш.
Бевина Мергн, Очра Сергей
