«Семейный портрет с посторонним» нертә наад олна оньгт тусхав

Нарт-делкән эрмдгтә улсин өдрт нерәдж танһчин орс театрин коллектив буйнч-седклин керг-үүлдвр давулв. «Семейный портрет с посторонним» нертә наад олна оньгт тусхав. Наадн шогта-инәдтә болвчн учр-утхарн, чинрәрн тодрха гиж келх кергтә.

«Семейный портрет с посторонним» гидг нааднд баһ биш эрмдгтә улс орлцв. Наад хәләһәд, инәһәд цаган сонньнар эдн давулцхав. Олн улсин тоод хөрн долата Джигмид көвүн бас наад хәләв.

Бидн түүрүн болж театрт иржәнәвидн, тегәд зөвәр байрта бәәнәвидн мадниг дуудснд гиж көвүнә эк Екатерина Мичураева келнә. Нааднд өдгә цага бәәдл-жирһл сән кевәр үзүлгджәнә. Күүнә үг сонсад, өөрхн улсан гемтәд тоолдг йовдл мана бәәдл-жирһлд харһна. тегәд эн наадн әмтнә жирһлин бәәдлиг йоста кевәр үзүлжәнә гиж Екатерина Мичураева тоолжана.

Элст балһснд бәәх Арнзл Болдырев болхла урднь чигн театрт иржәсмн. Урднь кесг соньн наад үзсмн. Эн нааднд болхла, Арнзлын зе көвүн, баһ наста артист Леонид Сангаджиев селән һазра Миша көвүнә дүр наачана. Тегәд эврәннь өөрхн садн Леонид Сангаджиевин наад хәләхәр, үнлхәр ирв . Сәәнәр наадв, нанд таасгдв. Ямр нег күүнә жирһлд харһдг тоотыг эврә дүрәрн дамжулад үзүлнә гидг амр керг биш. Иим йовдлмуд үнәртән харһна гиж Арнзл Болдыреву хан-тоолврарн хувалцв.

«Семейный портрет спосторонним» гидг нааднд селән һазрт бәәх нег өрк-бүлин жирһл үзүлгджәнә. Селәнә клубд ясвр кеһәд кеерүлжәх зурачин туск шог наадн болжана. Энүнә бәәдл-жирһлд кесг соньн тоот харһна.

Келхд, «Семейный портрет с посторонним» гидг наадн ирсн әмтнд йир таасгдв. Сонньнар хәләж, байртаһар цаган давулцхав.

Ээнән Дельгр, Очра Сергей