Селәнә эдл-ахус хаврин тәрәнд белдвр кежәнә
Үвлин кем төгсв. Ода селәнә эдл-ахун предприятьмуд хаврин тәрәнә көдлмшт белдвр кежәнә. Эдн трактормуд ясж белджәнә, талдан чигн техник ясжана. Тенгрин бәәдл ясрхла эдн кеер һарад тәрәнә көдлмш кехдән белн. Дәкж киитн болшго гиж эдн нәәәлжәнә. Тегәд эн жил сән урһц хураж авх ицл бәәнә.
Константин Иванов СПК-н хамгин баһ наста көдләч. Колледж төгсәсн хөөн эврәннь төрскн поселкдан хәрж ирв. Ирсн даруһан шин тракторар көдлдг дасв. Энүг предприять одахн хулдж авсмн.
“Первомайское” СПК-н мехнизатор Константин Ивановин келсәр, ода кеер һарч көдлхдән белдвр кежәнә. Техник ясжана. Теегт һарад көдлхлә, техник хамхршго.
Селәнә эдл-ахун көдләчнрт хаврин көдлмшин кем эклчкв. Цөн өдр болад эдн кер һарад, хаврин тәрәнә көдлмш эклх. Энүнә өмн техникан сәәнәр белдж авх кергтә, тосн-түлә кех кергтә.
Ясврин мастерскойин һардач Николай Яковенко келсәр, ода мастерскойд “Кировец” трактормуд дала бәәнә. Ясврин көдлмш гүргүдән. Сәәнәр механизатормуд көдлжәнә. Баһчуд бәәнә, дөрвн күн ирв.
“Первомайское” СПК-н толһач Анатолий Путеевин келсәр, олна мал үвлзүлһнәс бүрн-бүтнәр һарв. Болв зунын догшн һан-халун болн февраль сард болсн догшн киитн намрин тәрәнә өслтд му нилчән күргв. Намрин кемд тәрсн тавн минһн гектарас хөрн процентнь һарсн уга. Тер бийнь сән урһц хураж авх ицл бәәнә.
“Первомайское” СПК-н толһач Анатолий Путеевин келсәр, давсн жилд догшн һан-халунас көлтә арвн хойр сай арслнг һаруд унв. Зурһан минһн тонн буудя хураж авла. Хойр минһн тонн буудя үрв. Эн жил нәәмн минһн тонн буудя хураж авх зура бәәнә. Күсдундур минһн тонн шүрүн хот белдж авх зурата. Нег минһн тонн өвсн белдж авгдх.
Ода мана танһчд намрин тәрән му биш бәәдлд үвлзв. Тәрә шинжлж хәләснә хөөн, тәрәнә аһун далн тавн процентнь сән бәәдлд үвлзж, хөрн тавн процентнь му биш кевәр үвл дааж һарв. Зуг Целинн, Сарпинск болн Приютненск райодт эн туст күнд бәәдл тогтв.
Хальмгин селәнә эдл-ахун министрин дарук Геннадий Рогозина келсәр, эн жилин урһцин төлә давсн жилд селәнә эдл-ахус зун дөнч негн дундур минһн гектарт намрин тәрә тәрсн билә. Эннь нурһлж намрин цаһан һуйрин буудя. Арвн хойр минһн гектарт хар һуйрин буудя тәргдв. Эндр өдрт намрин тәрәнәс арвн юурвн дундур минһн гектарт тәрән үрв. Эннь арвн процентас баһ болжана. Намрин тәрән му бишәр үвлзв.
Зунын кемд ямаран урһц хураж авхин тускар ода келхд эрт. Энүнә төлә ода чигн дала көдлмш кех кергтә. Хаврин зунын кемд догшн халун эс болхла, селәнә эдл-ахун көдләчнр сән урһц хураж авх гиж нәәлжәнә.
Елена Алексенко, Ирчин Алексей
