Сарпинск районд сурһульчнрин туристическ слет болв

Сарпинск районд һучн тавдгч сурһульчнрин туристическ слет болв. Танһчин толһач зарлсн әәмшг уга бәәлһнә жилин программар Сарпинск района бичкдүдин Салют лагерьт танһчин район болһнас көвүд-күүкд слетд ирж орлцв.

Һучн тавдгч өөнин сурһульчнрин туристическ слетд танһчин булнг болһнас көвүд-күүкд ирж орлцв. Ут-тоодан арвн йисн командын ханьд хойр зун күн орв. Эн саамд баһчуд олн-зүсн боомтг давж һарһлһна марһанд, хәәврин болн харслһна көдлмш күцәв, чидлән сөрв, талдан чигн дөрлдәнд дииләчән йилһв. Городовиковск школын физкультурин багш Руслан Сафроновин тоолврар, иим марһас көвүд-күүкдиг негдүләд, диилвр бәрхд урмд өгнә.

Марһанд орцлачнр цуг даалһвриг тодрхаһар кеж, темдглсн цагт күцәв. Эдн палаткмудт бәәв, эврән хот-хоолан кев. Сарпинск района йиртмжин бәәдл эднд таасгдв. Иим таалд көвүд-күүкд бәәх дамшлт хоршаж авна.

Элст балһсна арвн доладчг школын сурһульч Сергей Тарасенко келсәр, иим туристическ слет дару-дарунь кехлә сән болх. Көвүд-күүкд эврән палатк тосхна, хотан кеж иднә. Эдн бачм чинртә бәәдлд бәәршлжәнә. Асхнднь дендр шатаһад, хамдан цуглрад ду дуулна. Баһчудт энд таасгджана.

Хар Булг селәнә школын сурһульч Санько Эрендженовин келсәр, талдан райодын көвүд-күүкдлә таньлдад, хәрлцә бәржәнә. Слет йир сән болжана. Шуугата нәр-наадн болна. Дендрин өөр сууһад гитар цокад ду дуулна. Йиртмжлә өөрхн бәәхлә сән болна.

Иим туристическ слетын һол күцлнь — эврәннь онц болн олна әәмшг уга бәәлһнә төрмүдт сурһульчниг даслһна төр тәвгджәнә. Тер мет бачм чинртә бәәдлд бийән яһж бәрхин туск дамшлт баһчуд авна. Иим авяьс зуг дамшлтын йовудт авч болх.

Эндр Хальмг танһчин сурһульчнрин туристическ слет көдлмшән төгсәх. Көвүд-күүкд гер талан хәрх, зуг эдн байн дамшлт хоршаж хәржәнә, олн шин нәәжнрән энд олж авв. Уйн наста туристнриг “Салют” лагерьт эднә багшнр сольх. Эндр Сарпинск районд танһчин багшнрин туристическ слет көдлмшән эклх.

Бевина Мергн, Очра Сергей