Сарпинск района бичкдүдин лагерьт армрлһна цуг таал бүрдәгдв

Ода Хальмг танһчин аһуд зунын кемд зун һучн долан, тер тоод нәәмн муниципальн бичкдүдин лагерь көдлжәнә, тер мет танһчин эрдм-сурһулин учрежденьст зун хөрн йисн өдрә плошадк үүлджәнә.

Жил болһн зунын амрллһна өдрмүдт Сарпан районд үүлджәх « Салют» нерәдллһтә лагерьт бәәрн района болн өөр бәәсн райодын көвүд күүкд ирж амрна. Хойр сарин эргцд зун хөрн баһчуд цогц махмудан батруллад цаган соньн кевәр энүнд давулв. Август сард нааран дәкәд тәвн күүкд арчж чадх. Өдр болһн бичкдүдин төлә кесг соньн керг үүлдврмүд бүрдәгднә. Көвүд күүкд шунмһа кевәр соньн марһаст орлцад бичкн белгүд авна.

Баһ Дөрвдә района Унгн Төрәч селәнәс ирсн Бадман Лижд эн амрллһн йир таасгдв. Көвүн энүнд олн үүрмүдтә болв, ирх жилд эн көвүн нааран бас ирж амрхар сана зүүжәнә.

Эн жилд мөнгн баһ болад района администрацин ахлачнр эврә арһарн лагерин ясвр кесн билә. Эн жилд энүнд бийән уһадг хорад халун усн орулгдсн билә, өөмдг бассейн тосхгдсн билә. Бичкдүдин кесгнь уснд орх әәнә гиж тренер Колмычкова Юлия келв. Хамгин түрүнд эдн шишлн эв арһ олзлад уснд орна, дасхсна хөөн эврән өөмнә.Өдр болһн бассейн өөр тренер, медицинск эгч бичкдүдиг хәләнә. Бичкн цагасн авн өөмж чадхла цааранднь эдн уснас әәлгон олн улст дөн нөкд күргж чадх гиж тренер Юлия Колмычкова келв.

Эн лагерьт бичкдүдин төлә замчнр сенр хот чанна, өдртән тавн дәкч эдн халун хот ууна. Лагерьт дамшлта эмч, медицинск эгч болн полицин көдләчнр дөн нөкдән күргнә.

Эн өдрмүдт зогсчах һан халун өдрмүдт бичкдүдин төлә бүрдәгдсн керг үүлдврмүд үдин хөөн болна гиж лагерин директор Санал Серятиров келвә. Үдин хөөн нарн баһар халулхла көүд күүкд олн зүсн спортивн нааднд һарад цогц махмудан батруллна.

Гертән ирчкәд амрсн көвүд күүкд энүнә тускар эрк биш школдан келж өгх. Бичкдүдин ик зунь Иргч жилд нааран ирх саната.

Бевина Мергн, Жамбин Дмитрий