Сарпа поселкд шин школ эн жил секгдх
Эн селәнә школд зун йирн нәәмн сурһульч сурч чадх. Эн жилин сентябрь сард селәнә делгрлтин программар Көтчнрә района Сарпа поселкд хойр давхрта шин школ секх зурата. Энүнә тосхлтын төлә зун сай арслнг йилһж өггдв. Энүг поселкд кесг жилдән тосхжана. Цөн жилдән школын тосхлт тас зогсв. Ода школын герт шалдарин болн ширдлһнә көдлмш кегджәнә.
Ольга Сетяевна класст долан сурһульч сурчана. Эннь дамшлтта багшин тоолврар, бас эвтә болжана. лайф Эклц классин багш Ольга Окчаеван келсәр, энүнә класс бичкн болв чигн, эдн нег өрк-бүл мет хоорндан ни-негн бәәнә. Көвүд-күүкд сурһулчн шамдһаһар дасжана.
Энүнә дөрвдгч классин көвүд-күүкд Элст балһсна бичкдүдлә әдл гүн медрл авх санатаһар цуг предметмудар соньмсжана. Зуг эдн хуучн бештә хуучн герт сурчана. Хойр минһн доладгч жил күртл школын беш нүүрсәр түлдг билә. Хуучн школ далн жилдән көдлжәнә.
Сарпинск школын директор Галина Максимован келсәр, энд школын директор болж зөрн жилдән көдлжәнә. Твән доладчг жилд кшол көдлжәсн бәәж. Урднь бешән нүүрсхр түлдг билә. Үвлднь киитн болдг бәәсмн. Деерк хувцтаһан суух кергтә. Хойр минһн доладгч жилд газ ирәд, сән болв. Ода школд дулан.
Ода Сарпа селәнә школд негдгч классас авн арвн негдчг класс күртл жирн һурвн сурһульч сурчана. класс болһнд таваһад — йисәһәд күн бәәнә. Урднь эн школд хойр селгәнд сурһуль болдг билә. Тиигхд класс болһнд һучн һурвн сурһульч оржасмн. Ода бичкдүдин то баһ. Тер бийнь өдгә цагин эрдм-сурһулин кемжән нааран бас ирв. Удл уга коллектив шин школдж нүүж орхар белджәнә. Энд һучн негн күн көдлжәнә. Эн жилин сентябрь сард эдн шин хойр давхрта школд нүүж орх. Энүнд зун йирн нәәмн сурһульч сурж чаджана.
Сарпа племзаводын генеральн директор Михаил Мутуловин келсәр, шин школ поселкин сойлын цутхлнг болх. Энүнд нүүж орхла шин оборудовань кергтә болх. Хуучн школас нег чигн оборудовань нааран авч ирх керг уга.
Шин школын гериг селәнә делгрлтин программар хойр минһн доладгч жилд экләд тосхв. Энүнә хөөн тосхлт зогсв. Болв селәнә улс энүнәс нег чигн тоосх хулхад өгсн уга. Зуг хойр минһн арвн хойрдгч жилд тосхлт дәкнәс эклв. Эн послекин школ района цутхлнг селәнәс болн Элст балһснас холл бәәв чигн, энүнд цуг багшнр бәәнә. Сул орм уга.
Көтчнрә РМО-н администрацин сойлын болн эрдм-сурһулин әнгин һардач Инна Бургуеван келсәр, танһчин эрдм-сурһулин министерств багшнрин сул ормин тускар бичг илгәв. Энүнд Көтчнрә район уга. Ода районд цуг багшнр бәәнә. Сул орм уга болжана. Эннь сән керг.
Школын тосхлтын төлә олн-зүсн бюджетас зун сай арслнг йилһж өггдв. Ода школывн герт шалдарин болн ширдлһнә көдлмш кегджәнә. Энүнд автономн дула өглһнә систем орулснас иштә школын герт дулан. Эн жилин сетябрь сард эрдм-сурһулин халх шинрүлһнә государственн программар ирх школьн оборудовань шин классмудын хораст углж тәвгдх. Сарпа поселкд бәәх дошкольн наста дөчн көвү-күүкнә төлә района һардачнр бас белг кех зурата.
Көтчнрә РМО-н администрацин толһач Валерий Очировин келсәр, ода поселкд далн бичкдүд бәәнә. Шин школд салу үүд кех арһ бәәнә. Тегәд энүнд тәвн көвүн-күүкн ордг бичкдүдин сад секж болх. Ода Сарпа поселкд хөрн тавн бичкдүд садт орж чаджана.
Долан зун найн күн бәәх хол поселкд эннь йоста сән белг болх. Энүнлә селәнә улс ик зура темдглж авчана. Селәнә делгрлтин болн эрдм-сурһулин халх шинрүлһнә государственн программар Хальмг танһчин хол селәдт өдгәц агин некврлә ирлцәтә эв-арһ ирв. Энүнә иштә селәнә улсин бәәдл-жирһлин чинр ясрв, эрдм-сурһуль шин чинртә девснгд һарчана.
Хавтхна Элла, Котина Валерий
