Сарматмудын алтн кегдлмүдин һәәхүл Пальмовин нертә музейд секгдв
Ода Хальмг танһчин әмтн сарматмудын алтиг эврәннь нүдәрн үзж чадх. Элст балһснд түрүн болж өвәрц һәәхүл секгдв. Энүг Астраханск музей-заповедникас авч ирв. Үнтә төмрәс кесн хөрн предмет болн фотозургуд Пальмовин нертә келн-улсин музейд һәәхж болх.
Алтн кеерүл, урн һарар сиилүлж кесн олн-зүсн бүсмүд мана танһчин улст өвәрц болх. Болв сармат улсин хаана оршаврас авсн кеерүл хамгин соньн экспонат болх зөвтә. Сармат келн-улсин хаанла хамдан оршаврт тәвгдсн цергә мөрнә өрчнь болн тонг ке-сәәхн зеегтә алтн кеерүләр сәәхрүлгдж гиж музейин специалистнр цәәлһвр өгв. Тер хуучн цагт күүкд улсин кеерүл олнд тааста бәәсмн. Пальмовин нертә музейин әнгин һардач Светлана Оконован келсәр, иим сәәхн кеерүл бәәсн болдг. Хамгин олн кеерүл сарматын ора цагин предметмүд болжана. Эн цагт сармат күүкд улсин олна чинр йир ик бәәсмн. Күүкд күн мөр унад, цергчнрлә хамдан дәәлдәнд орлцдг бәәж.
Ода нарта-делкән олн музеймүд иим һәәхүл үзүлх саната. Хальмг танһчин правительствин ахлачин негдгч дарук Вячеслав Илюмжиновин келсәр, мана танһчд секгдсн иим өвәрц һәәхүлд мана региона әмтн кезәнк цага эрдмлә өөрхн таньлдж чаджана. Хальмг танһчин негдгч вице-премьер Вячеслав Илюмжиновин келсәр, мана танһчд иим һәәхүл ик чинртә йовдл. Мана музейд олн-зүсн соньн һәәхүлмүд секгднә. Түрүн болж иим өвәрц алтн кегдлмүдин экспонат үзх арһ учрв. Энүнд ик хуранһун зуг нег әнгнь тәвгдв.
Музейин көдләчнрин тоолврар, Элст балһсна улсиг болн гииичнриг сармат улсин алтн кегдлмүд соньмсулх зөвтә. Энүнлә археологуд болн танһчин хәәврин отрядын элчнр зөвшәржәнә. Эднә келсәр, археологическ бумбсиг хәләхд соньн болсн деерән, иим һәәхүл немр медрл өгнә. Хальмгин университетин туужин кафедрин һардач Петр Кольцовин келсәр, мана танһчд ончта йовдл болжана. Сармат цагин предметмүд номтнрт соньн болна. Скиф-сарматын сойл ут-туужта. Эн келн-улс Евразийск теегт ик һазрин аһу эзлж йовсмн. Эднә аһу Днепр һолас авн Ордос күртл бәәж.
Эн өдрмүдт сурһульчнрин болн оютнрин төлә экскурсь бүрдәгдх. Туужин эрдм дасжах баһчудт иим һәәхүл сурһульднь дөнцл материал болхнь лавта. Элст балһснд сармат улсин алтн нег долан хонгтан бәәх. Элстихн болн хотл балһсна гиичнр өвәрц һәхүл үзсн деерән, кезәнк улсин туужла өөрхн таньлдж чадх.
Ээнән Делгр, Хулхачин Николай
