Приютное селәнд бичкдүдин садт орх чеерүд уга

Дошкольн учрежденьст чеерүд баһрулһна төриг немр багмуд секж хаһлжана. Танһчин цуг райодт федеральн шишлнг программар садын гермүдт капитальн ясвр кегджәнә, шинрүлж яслһна көдлмш күцәгджәнә. Приютное селәнд Бамб цецг нертә бичкдүдин садт эн жилин намрар дөчн көвүн-күүкн ирв.

Галина Еременко “Бамб цецг” бичкдүдин садт кесг жилдән көдлжәнә. Эн жилмүдин эргцд нег минһн көвүн-күүк дошкольн учрежденас һарв. Ода энд арвн негн баг бәәнә, ут-тоодан хойр зун бичкдүд оржана. Одахн немр хойр баг секгдв. Школд белдврин болн ясельн баг.

Энд урднь зургудын галрей бәәсмн, ода көвүд-күүкдин унтдг хора бәәнә. Школд белдврин багд зурһан-долан наста хөрн бичкдүд оржана. Энүнд шин орн болн мебель хулдж авгдв.

Немр багин төлә шин ширә, сандл, наадһас болн шкафмуд хулдж авч. Шишлнг программар ирнс федеральн зун минһн арслнг мөнгәр дошкольн эрдм-сурһулин делгрлтин төлә олзлгдв.

Приютное селәнә “Бамб цецг” бичкдүдинс адын һардач Галина Еременко келсәр, ода садт чеерүд уга. Эннь немр багмуд секснәс авн уга болв.

Талдан нег баг хамгин бчикн наста көвүд-күүкдин төлә секгдв. Энд хөрн бичкдүд оржана. Сурһмжлач Лидия Маливанован келсәр, иим баг секхинь эк-эцкнр ик кезәнәс авн күләжәнә. Тегәд чигн бичкдүдин садын көдләчнрлә хамдан ясврин көдлмшт эдн нөкд болв.

Урднь энд нег баг көдлжәлә, хөөннь энүг хаав. Ода хөрн көвүн-күүкн оржана. Шин мебель болн наадһа хулдж авла, эк-эцкнр сән дөн күргв.

Дәкәд болхла дошкольн учрежденьд дула өглһнә автономн систем көдлжәнә. Эн жил садын герт дула өглһнә турвас болн батарей сольв.

Энүнә төлә һурвн сай арлснг кергтә болв. Ода дула өглһн бүртклһн бәәнә гиж садын көдләчнр келнә. Ода дошкольн учрежденя хораст дулан.

Садын һардач Галина Еременко келсәр, дошкольн көдләчнр болн эк-эцкнр байрта бәәнә. Хорас дулан, сарул. Нааран бичкдүд дурлж иржәнә.

Ода бичкдүд шин жилин байрт белджәнә. Эдн шин ду дасжана, би биилхәр белджәнә, шүлгүд дасжана. Эднә зәрмнь түрүн болж иим нәр-наадн орлцх.

Баира Петрова, Котина Валерий