Приютненск районд Николай Воробьевин санлын марһан болв
Волейболын тускар дәкәд нег зәнг. Приютненск районд Советск Союзин Герой Николай Воробьевин санлд нерәдгдсн марһан болв. Энүнә нер зүүжәх селәнд района спортсменмүд ирж дөрлдв алдан райодын элчнр бас ирв. Тер мет эн өдр Афганистанд интернаицональн даалһвр күцәсн цергчнриг бас тодлв.
Марһана омн цуг әмтн Николай Воробьевин санлд нерәдгдсн минитнгд орлцв. Баатр-зөрмг дәәч дөчн тавдгч жилин фнвралин арвн дөрвнд хортнла дәәлджәһәд әмнәсн хаһцв. Селәнә администрацин толһачин Немошкаловин келсәр, жил болһн эн өдр дәәнә ветеранмудын меморилаьн комплексин өөр санлын керг-үүлдврмүд болна, цецгүд тәвгднә. Уйн наста Воробьевка селәнә бичкдүд дәәчин амр биш цергә хаалһин тускар цугинь меднә. Школьн музейд зөрмг эн һазра күүнд стенд нерәдгдв. Николай Воробьевд Севетск Союзин Геройин нерн зүүлһгдсн билә.
Воробьевка селәнә толһач Павел Немошкаловин келсәр, зөрмг дәәч зун арвн йисн наста бәәж. Залһлдана әнгд дәәлдв. Залһлдан кеж йовад, әмнәсн хаһцв. Дунай һолын нег көвәһәс авн талдан көвә күртл залһада татсн бәәж.
Волейбольн марһан эн селәнд долан жил дарандан бүрдәж давулгджана. Эн жил кубокин төлә нәәмн команд дөрлдв. Энүнд нурһлж Приһтненск района коллективмуд болн Ик-Буурла района нег команд чидлән сөрв. Эднә тоолврар, арвн долан настадан дәәнд одад, баатр-зөрмг кевәр төрскән харссн Николай Воробьевин санл тодлгч марһан болжана.
Эн күүкд күүнә келсәр, баатр-зөрмг салдсин санлд нерәдгдсн марһан болжана. Приютненск района һазра күн. Дәәнә цапгт Советс Союзин Героийн нер зүүв. Эднд иим дөрлдә онц чинр зүүжәнә. Иим улсин нилчәр Әрәсә ода цецгәржәнә. Эн залу күүнә келсәр, иим марһанд зөрмг салдсин санл тодлгджана. Кемр диилвр бәрхлә, энүг эн һазра күүнә санлд нерәджәнә.
Төрсккн һазран харсад әмнәсн хаһцсн дәәчнрин санл тодлгч дөрлдән цуг спортсменмүдиг негдүлв. Баатр-зөрмг салдснрин нерд мемориальн комплексд бичәтә. Зүткәтә марһана ашт Первомайское селәнә муниципальн бүрдәцин команд дамжулж өгдг кубок шүүж авв. Келхд, давн жилд эдн бас түрүн орм эзлсн билә. Онц темдгдхд, первомайцнр сүл һурвн жилд марһана дииләчин нер зүүжәнә. Тегәд кубокиг эднд мшнкинд үлдәх шиидвр авгдв. Тер мет эн өдрмүдт Приютненск районд Афганистанас советск церг һарһсна хөрн тавн жилин өөнд нерәдгдсн керг-үүлдврмүд болжана.
Приютненск РМО-н администрацин толһач Иван Кравченко келсәр, районд бүрдәмжин комитет бүрдәгдв. Школмудт, ПТУ-д техникумд олн харһлтс болжана, баатр-зөрмгин кичәлмүд бүрдәгджәнә. Энүнд цергчнр-афганцнр, дәәнә ветеранмуд орлцжана. Иим харһлтс бичкдүдт олз-туста болжана. Эдн ик оньган өгч сонсжана.
Февралин хөрн негднд Приютное селәнд дәәчнр-интернационалистнрин төлә байрин концерт болх, спортивн марһан бүрдгдх. Афганистанд әмнәсн хаһцсн салдснрин санл тодлж әмтн нег минутд тагчг зогсх. Афганистанд дәәлдсн района жирн хойр цергчнрәс хойр салдс Вячнслав Манджиев болн Александр Ильин хәрж ирсн уга.
Ээнән Ольга, Хулхачин Николай
