Приютненск дундын школд сурһульчнр даарчана
Тер саамд Приютненск дундын школд сурһульчнр даарчана. Ода классмудт дегд киитн. Иим бәәдл уга энд ясрх гиж багшнр нәәлжәнә. Эн жил эрдм-сурһулин халх шинрүлһнә федеральн программар эн сурһулин учрежденьд капитальн ясвр кегдхмн.
Приютное селәнә школд энүнә гер тосхнас авн капитальн ясвр тас кегдәд уга. Эн жилмүдт зуг бичкн ясвр кегднә. Эк-эцкнрин орулж өгсн мөнгәр зуг эрс цаһалһна, ширдлһнә көдлмш кегднә, линолеум цөн класст сольгдв. Болв киитн өдрмүд тогтхла, эн төрмүдт оньг өггдсн уга. Эннь бас учрта. Приютненск школын завхоз Иван Ковалевин келсәр, школын герин терзин шилин ормд полиэтилен тәвж. Классин хорад терзд цанг бууж. школд дегд киитн.
Приютненск школын сурһульчнр кичәлмүдин завсрт дула өгдг аппаратмудын өөр бәәнә. Багшнрин келсәр, давсн долан хонгт школын герт дулана кергтә кемжәнәс зөвәр киитн болв. Тегәд чигн кичәлмүд һучн минутд болна. Тегәд сурһульчнр школдан дулан хувцан тәәлжәхш. Школд йир киитн. Зәрмдән кичәлд дулан хувцта бәәнә.
Иим бәәдл эн школд жил болһн тогтна. Сурһульчнр иим таалд дасад бәәв. Тер мет эднә эк-эцкнрнь бас зовдган уурсн бәәдлтә. Приютненск школын директорин дарук Ирина Седенко келсәр, ода бичкдүд иим күнд таалд сурчана. Тер бийнь эдн өдр болһн школан дутахш. Зәрмдән эдн багшасн эркт кичәлмүдтән ирнә.
Эн школын сурһульчнр үвлин дуусн киитн школд сурх зөвтә. Юнгад гихлә, терз-үүд болн дула өглһнә систем ясхин төлә мөнгн бюджетд күртжәхш. Болв удл уга эн төр хаһлгдх арһ учрх. Приютна школ капитальн ясвр кех Әрәсән федеральн программд орв. Иим ясвр энд эн жил эклх. Федеральн хазнас тавн сай арслнг ирх. Приютненск РМО-н толһач Иван Кравченко келсәр, района бюджетас школд күсдундур сай арслнг йилһж өггдх. Эн мөнгәр дула өгдг автономн систем школд ясгдх. Приютненск школын директор Ольга Медведеван келсәр, үлдсн мөнгәр терз-үүд сольж болх. Школын директор Ольга Медведеван келсәр, ода деерән школд йир киитн. герин ора, пол болн эрс шинрүлх төр бас бәәнә. капиальн ясвр кехлә школд дулан болх зөвтә гиж директор келнә.
Эн жил арһ-уаг үвләд һарх кергтә гиж Ольга Медведева темдглв. Болв иим күнд таал школд яһад тогтсмн? Бүртклһнә органмуд альд бәәсмб? Энүнә учринь медж авх кергтә.
Санкун Кермн, Очра Сергей
