Православн христанмуд әрүн Пасхин байр темдглв

Давсн нарн өдр православн шажнд шүтдг улс әрүн Воскресение Христова сергжмтә байр темдглв. Танһчин цуг чонжст байрин мөргүлмүд болв. Байрин хамгин һол керг-үүлдвр — Казанск кафедральн чонжд сөөһәр болсн мөргүл болв.

Элст балһсна Казанск кафедральн чонжд болсн байрин ик мөргүлиг Элстин болн Хальмгин епархийн сегләтр, епархиальн учрежденя һардач протоиерей Алексей Гришенко һардв. Мөргүлд олн улс ирж орлцад, сергмжтә Пасхин байр тосв.

Архиерей чонжд уга болсн бийнь, Элст балһснд православн хамгин ик чинртә байр болв. Тер мет Христовоздвижеснк чонжд зерг бас байрин мөргүл болв. Энүг протоиерей Анатолий Скляров һардв.

Эн жилин православн Пасхин байр сүл арвн жилин эргцд католикудын болн протестантнрин Пасхин байрла ирлцв. Байрин ки мөргүл хойр келәр орс болн хальмг келәр күцәгдв. Әрүн Пасхин байрин мөргүлд ик баһ уга ирж орлцв. Сүл цагт мана танһчд олн улс өвкнриннь уул зангшал авьяс болн шаж шинәс сергәж делгрүлдәж темдг болв.

Мария Мальченко келсәр, Хальмг танһчин һазрт әмтн цуһар ни-негн бәәж, бәәхтә жирһл эдлтхә гиж зальврна. Әмтн нег-негндән нөкд болх зөвтә.

Эндр чонжд тадн ямаран ухан-санатаһар ирвт? Юуна тускар зальврж мөргжәнәт гисн сурврмудт олн улс әдл гилтә хәрү өгв.

Константин Кирпилевин келсәр, ода Украинд хур бәәдл тогтв. Тенд энүнд элгн-садн бәәнә. Тенд эвин кевәр хур йовдл халһгдх гиж нәәлжәнә.

Сөөнь өрхллә хонгин әәд чожд хорһн шам шатасна хөөн цаһан хувц өмссн чонжин гелнгүд олн улсла хамдан чонж эргәд йовцхав. Энүнә хөөн заутреня болн байрин литургий болв. Энүнә чилгчәр кирсин болн көгл тимтин өнгтә шишлнг өдмг әрүслгдв. Энүнә хөөн олн әмтн “Христос Воскресе” гиж байртаһар хәәкрж келв.

Иим үгүмдәр православн христианмуд нег негән дкәд дөчн хонгтан күндлж йөрәх. Библейск домгар Иисус Христос дөчн хонгтан һазр деер бәәсмн. Апрелин арвн йиснд бембә өдр Хра Гроба Господня чонжд әүрн һал шатагдв. Энүнә хөн энүг Москва балһснд Иерусалимас хөрн һурвн час сөөһәр авч ирв. Хальмг танһчд Әәдрхн балһснас Элст балһснд әрүн һал сө һурвн часла авч иргдв. Байрин сөөһин ик мөргүлд Хальмг танһчин толһач Алексей Орлов болн Хальмгин правительствин ахлач Игорь Зотов орлцв. Байрин мөргүлин хөөн Алексей Орлов цуг улсиг Пасхин байрла йөрәв.

Алексей Орловин келсәр, Әрәсәд өдгә цагт олн шажна улс ни-негн бәәж, првославн улсла хамдан зальврад, бәәхтә жирлһ Нег-негндән дурджана.

Пасхин хөөн болдг долан хонг Светлая Седмица гиж нерәдгднә. Тегәд Иисус Христосин воскрешения хөөн долан хонгтан гейүрдх керг уга.

Хавтхан Элла, Эрнжәнә Эрднь