Православн үүлдәчнр шажнд шүттг улст үлгүр-үзмж болх зөвтә

Православн шажна үүлдәчнр ода әрүн текстмуд чеежәр медсн болн мөргүл давулсн деерән, шажнд шүттг улст үлгүр-үзмж болх зөвтә гиж православн әмтн тоолжана. Отец Антоний Зимовец дигтә иим некврлә ирлцжәнә.

Православн чонжд мөргүл шинкн төгсв, энүнд орлцсн әмтн әдс авчана. Энүнә хөөн зәрм улс гелнглә харһад күүнджәнә. Өдгә цагт православн әмтн чонжд ирхләрн, зуг мөргүлд орлцхар ирхш. Гүн медрлтә болн дамшлтта гелнглә күүндәд, сүв-селвг авснь хальмгин православн шажнд сүзглгдг улсин оюни жирһлин ик чинртә әнг болжана. Казанск кафедральн Соборин иерей, отец Антоний чонжд ирсн улст эрк биш дөн болхар зүткнә. Эн залу күүнә келсәр, отец Антоний оньдин эгл улст нөкд болна. Оньган өгч сонсад, сүв-селвгән өгнә.

Отец Антоний чонжд арвн жилдән көдлжәнә. Түрүн авгтан чонжин хоорд дуулдг биләв гиж эн келнә. Тер цагт ямаран жирһлин хаалһ шүүж авхин тускар ухалжасмн. Отец Антоний келсәр, бичкн цагтан православн шажна авьясар бәәсн бийнь, школд сурчаһад буддизмар соньмдсг болв. Ода эн гелнг православн шаж гүүнәр дасж, олн тоот медж авв.

Антоний Хальмгин университет төгсәһәд, инженерин эрдм дасж авсмн. Ода болхла Ставропольск духовн семинарий төгсжәнә. , учн наста гелнгин келсәр, өдгә цагт энүнә көдлмшин һол төрнь — чонжд ирсн улст үлгүр-үзмж болх саната. Эн күцлдән күрхәр зүткжәнә. Ода спортар болн көгжмәр соньмсдг болв. Тайский боксар, дорд үзгин эв-арһар бөк бәрлдлһәр, настольн теннисар чигн соньмсад, цогц-махмудан батрулад, седклән төвкнүлж чадв. Авальтаһан әдл гилтә нертә Антон болн Антонина. Хамдан долан жил бәәһәд, һурвн үрән Павел, Александра болн хойр наста Ника күүкән өскжәнә. Матушка Антонина багшин эрдм-сурһульта. Авальдан дөн болна, чонжин хоорд дуулжана. Антонина Зимовец келсәр, талдан күүкд улсас хөвтә күн бәәж. Авальнь гелнгин хаалһ шүүж авад, дааврта күн болв, шагшавдын халхар цевр-цер болжана. Зәрмдән өрк-бүләрн ду чигн гертән дуулна.

Татьяна Дмитриева, Ирчин Алексей