Пенсионн сангд даатхлһна мөнг орулж өглһнә ик өрн цуглрв
Пенсионн даатхлһна мөнг орулж өглһнә өрн зун далн сай арслнгд күрв. Ода танһчин нәәмн зун тәвн предпряить-организацс өрнд унсн бәәнә. Эднә тоод бюджетн организацс бас йовна. Иим предприятьмудын һардачнрас көлтә көдләчнин пенсионн тетклһн күнд бәәдлд тусв.
Ачта амрлһнд һархла пенсин мөнгәр яһж бәәхмб? Эн хурц төртә сурврт Элст балһсна әмтн олн-зүсн хәрү өгнә. Үлгүрнь, Владимир Бадмаев эврәннь пенсионн даахлһна мөнгиг интернетын дөнгәр тоолж һарһжана. Светлана Мошинская болхла эврәннь предприятин һардачнрт иткжәнә.
Владимир Бадмаевин келсәр, ода деерән пенсин тускар үүмжәхш. Ода чигн хол гиж медгднә. Тер бийнь ачта амрлһнд һарх цаг ирх. Даатхлһна мөнгиг тускар интернетд хәләнә.
Светлана Мошинская келсәр, организац даатхлһна мөнг йовулна. Государственн учрежденьд көдлжәнә, бичкдүдин садт. Зуг жалвнь дегд бичкн. Тегәд пенсь бас бичкн болх.
Элст балһсна бәәрн күн Сергей Селивановд эн халхар күнд бәәдлд тогтв. Энүнә көдлжәсн һазрас пенсионн сангд мөнг орулж өгч уга, нег үлү энүнә көдлсн жилмүдт күч-көлснә стажд орсн уга.
Сергей Селивановин келсәр, көдлжәсн цагт мөнгиг конвертд өгдг бәәж. Иим кевәр эдниг меклв. Гемин уршгар көдлмшәсн һархла, күч-көлснә дегтрт хйор жилдән көдлсн цаг орж уга.
Предприять-организацс пенсионн системин һол орлцачнр болжана. Пенсионн сангд орулж өгнс даатхлһна мөнгнәс көдләчнрин пенсионн тетклһнә мөнгн тогтна. Кемр предпряитин һардачнр даатхлһна мөнг эс орулж өгхлә ю кехмб? Энүнә тускар пенсионнс ангин көдләчнр цәәлһвр кев.
Пенсионн сангин әнгин специалист Сергей Халушевин келсәр, иим программ Эталон нертә залврин оперативн систем гиж нерәдгднә. Энүнд даатхлһан мөнгин туск зәнг орж ирнә. Эн программин дөнгәр кедү даатхлһна мөнгн орж ирсинь бүрткж болна. Бүкл танһчар болн цуг райодар хәләж болх. Даатхлһан мөнг орулж өглһнә болзгинь медж болна. Ямаран организацс кедү өрнд унснь бас үзгднә.
Пенсионн сангд орулж өгдг даатхлһна мөнгн государствд тооца кехин төлә эрк биш орулж өгдг болсн деерән, иим мөнгн көдләч болһнд өгх мөнгнә кемжән болжана. Ода тадн эврәннь экрандан иим мөнг орулж өгдго предпряитин списк үзжәнәт. Эдн дунд бюджетн организацс бас йовна.
Пенсионн сангин әнгин специалист Сергей Халушевин келсәр, эндр өдрт нәәмн зун тәвн предприять болн онц арһлачнр зун далн сай арслнг өртә бәәнә. Эннь нурһлж селәнә эдл-ахун халхин предприятьмуд. Эдн хөрн дөрвн процент тогтажана. Тер мет ик өрнд тосхлтын организацс унв. Дәкәд болхла олн бюджетн организац бас даатхлһна мөнгнә өрнд унсн бәәнә.
Пенсионн сангд орулж өгдг даатхлһна мөнгнә өрн жил ирвәс өсәд йовна. Энүнә тускар көдләчнр сәәнәр медхш. Пенсионн сангин көдләчнрин тоолврар, иим бәәдлиг зуг хамдан чидлән негдүләд чиклж болхмн.
Елена Алексенко, Очра Сергей
