Овата селәнд бичкдүдин садт немр орм секгдх

Танһчин селәдт бичкдүдин садмуд дутжах хурц төриг гермүд шинрүлж яслһна нилчәр хаһлжана. Үлгүрнь, Целинн района Овата селәнд бичкүдин садын герт ясврин көдмш кесн хөөн, немр орм секх. Тегәд сентябрь сар күртл бичкдүд садт орх чеерүд уга болх.

“Тополек” нертә бичкдүдин садт немр орм секхинь арвн һүврн көвүн-күүкн күләжәнә. Тер тоод бичкн Эникра Балиткиева садт орх саната. Энүнә экин тоолврар, бичкн күүкнд талдан көвүд-күүкдлә наадад, делгрлт авх кергтә болжана.

Овата селәнә бәәрн күүкд күн Зерема Балиткиеван келсәр, күүкнь күсдундур нас күрч. Садт орх саната. Эн зунар эрлһ бичж орулв. Ода кезә садт орхин күләжәнә. Талдан бичкдүдлә наадхдан дурта.

Садт ясврин көдлмш эн жилин июнин эклцәр эклсмн. Бичкдүдин садын гер кезә жил тосхгдсн тускар ода күн медхш. Селәнә медәтнрин келсәр, эн гер ик кезәнәс авн дөчн тавгдчн жилд зогсжадла. Тегәд энүнд капитальн ясвр кеж, ораһинь шинрүлх, терз-үүдинь сольх кергтә болв. Урднь эн герт магазин болн хөөннь интернат бәәсмн. Энүнә хөөн энүг дошкольн учрежденьд өгсмн. Ода селәнә бичкдүдин садт һучн көвүн-күүкн оржана.

Оватинск СМО-н ахлач Владимир Саранговин келсәр, бичкдүдин садт ясврин көдлмш бәәрн болн района бюджетмудын мөнгәр кегджәнә. Һурвн зун минһн арслнг оар шинрүлһнд һарв. Арвн негн терз сольгдв. шин үүдн тәвгдв. Зәрм көдлмшиг эврәннь чидләр кежәнә.

Садын һардач Татьяна Малинован келсәр, ясврин хөөн герин аһуг икдүләд, немр орм секх зура бәәнә. Хув-хунр тәәлдг һазриг коридорт һарһад, энүнд дула орулад ясвр кех кергтә. Тиигхлә ода чееүрдт зогсжах цуг бичкдүдиг арвн һурвн көвүн-күүкиг нег багд орулж болх. Невчк уутьхн болх, тер бийнь эк-эцкнр иим бәәдллә зөвшәржәнә. Тер мет ирлцнһү ведомствс тогтсн бәәдлиг тоод авад, эднә седвәриг дөннв.

Садын һардач Татьяна Малинован келсәр, Бичкдүдин садын гер дегж хуучн. Энүг хамхлх кергтә. Зуг уһрвн хун хөрн зурһан метр аһута. Эннь дегд баһ болжана. Һучн көвүн-күүкн оржана, дәкәд арвн һурвн бичкдүд чеерүдт зогсжана. Селнәд ода бичкдүдин садт өгх ирлцнүһ гер уга. Арһ уга, ясврин көдлмш кеһәд, гер шинрүлжәнә.

Тегәд Целинн районд бичкдүдин садт орх улсин то невчк баһрх. Ода ут-тоодан долан зун бичкдүд садт орхар чеерүдт зогсжана. Тер мет эн өдрмүдт ясврин көдлмш Баһ Чонс, Вознесеновка болн талдан чигн селәдин садмудт ясврин болн шинрүлһнә көдлмш кегджәнә. Тер мет Троицкое селәнд шин жошольн учреждень бәрх зура бәәнә. Энүнә төлә района һардачнр мөнг хәәж авчана, бичкдүдин садмуд дутжах хурц төриг талдан чигн эв-арһар халһх саната. Юнгад гихлә, жил ирвәс Целинн районд нилхин то өсәд йовна.

Ээнэн Ольга, Колдан Церн