Орсин театр шин наад белджәнә
Ганна Слуцки бичсн “6 блюд из одной курицы” нертә пьесар драмин болн шог наадна орсин театр шин наад белджәнә. Шин шог наадн танһчин хәләһәчнрт таасгдх гиж артистнр нәәлжәнә.
Людмила Мансурова болн Владимир Маркин шин шог нааднд һол дүрмүд наадхмн. Танһчин ачта артистк олигархин экин дүр нааджана. Көвүндән сә кехәр, энүнд бәәхтә жирһл теткхин төлә цугинь кехдән белн бәәнә. Көвүнә көдлмш кех саната, энүг церглин өслтд дөн болх зурата, авалинь чигн шүүж авх саната. Энүнә төлә шишлнг өрк-бүл тогтадг агентств бүрдәв. Болв дөнч наста көвүнәннь дурна седклиг бүрткж чаджахш.
Артист Владимир Маркин олигархин дүр наадхин төлә ик белдвр кех кергтә болв. Энүнә төлә байн улсин туск фильмс хәләв. Болв актерин тоолврар эннь хамгин һол керг биш. Шин нааднд ик чинртә болн хурц төр босхгджана. Эк-эцкнр эврәннь үрдүдиннь төлә цугинь кех саната.
Орсин театрин артист Владимир Маркина келсәр, шин наадар дамжулад олн улст хурц төрин тускар медүләд келж өгхлә, мана көдлмш олз-туста гиж келж болх.
Нертә сценарист Ганна Слуцкин пьесиг театрт шүүж авснь бас учрта. Театрин ах режиссер Владислав Константиновин келсәр, шин сезонд орсин театр өдгә цагин төрмүдт онц оньг тусхахар шиидв.
Режиссер Владислав Константиновин келсәр, шин шог наадн йир соньн болжана. Энүнд сән көгжм орулгдв. Артистнр олн-зүсн соньн дүрмүд нааджана. Иим көдлмш эднд таасгджана. Тетарин хойрдгч шин наадн ноябрин арвн тавнд үзүлгдх. Энүг Элстин хәләһэчнр болн гиичнр оньган өгч хәләх гиж нәәлжәнә.
Сүл жилмүдт драмин болн шог наадна орсин театр эврәннь үүдәврмүдәрн талдан регионмудын хәләһәчннриг байрлулжана. Одахн артистнр Тамбов балһснд “Корсиканка”, “Простая история”, “Детектор лжи”, “Тартюф” наадд үзүләд, олн улсин зүрк авлв. Тенд доладгч театральн фестиваль болсмн. Драмин болн шог наадна орсин театрин өдн артист Александр Шеглов Әрәсән хамгин сән гисн актерин нер зүүһәд, зун минһн арслнга мөрә шүүж авв. Театрин үзүлсн наадыг болхла Әрәсән театральн шалһачнр өөдәнәр үнлв. Елена Судакова болхла хойрдгч плана дүр нертә номинацд ончрв. Тегәд шин сезон бас соньн болх гиж күләгджәнә. Эн өдрмдүт театрин һардачнр Новочеркасск балһсна театрин ах режиссерла нөкцлт кехин тускар күүндвр кежәнә. Ода болхла артистнр хамгин бичкн хәләһәчнрт наад белджәнә.
Режиссер Владислав Константиновин келсәр, шин жилин байрт бичкн көвүд-күүкд шин тууль белдх зура бәәнә. Бичкн хәләһәчнриг оньдин күләнә. Шин тууль “День рождения кота Леопольда” гиж нерәдгднә. Энүнә сонбьн дүрмүд наадх, тер тоод альвн хойр хулһн.
Шин сезонд драмин болн шог наадна орсин театр шин наадар хәләһәчнрән байрлулх саната. Ноябрин арвн тавнд театрт “6 блюд из одной курицы” нертә шог наадна түрүн үзүлвр болх.
Батан Санжирма, Эрнжәнә Эрднь
