Олна мал үвлзүлһнд ик киитн харш болсн уга

Олна малд үвлд күрх хот бәәнә.Энүнә тускар Хальмг танһчин селәнә эдл-ахун министерствин көдләчнр зәнглв. Ода деерән мана танһчд ик киитн болжасн бийнь, олна мал үвлзүлһнә йовудт эннь ик харш болсн уга.

Ик кезәнәс авн хальмгуд дөрвн зүсн мал — мөр, үкр, хө болн темә өскж йовсмн. Целинн района Адуч нертә крестьянск — фермерск эдл-ахуд һурвн зүсн мал өскжәнә.Ода деерән эдн темә авч өскәд уга. Эдл-ахун малчнр хальмгин тохма бод мал өсклһнд онц оньг тусхажана. Энд бәәх Хальмгин тохма хойр минһн тавн зун үкрәс өрәлнь туһлх.Тегәд ода эдниг арднь орж асрж, услх кергтә. Адуч нертә крестьянск фермерск эдл-ахун һардач Баатр Адучиевин келсәр, ода деерән олна мал үвлзүлһнә көдлмш бүрдәмжтәһәр давулгджана. Юнгад гихлә давсн зунын намрин кемд үвлд күрх малын хот белдж авгдв. Нег үлү, дулан цагт мал кеер идшлв. Асхнднь малд өвс болн талдан чигн хот өгнәвидн.

Сүл өдрмүдт генктн киитн болн йовдл, эдниг икәр үүмүлсн уга. Иим киитнд бод мал кеер һарна, эдниг малчнр ик оньган өгч хәләжәнә. Баатр Кануровичин келсәр, иим киит зуг хальмг тохма мал дааж һарна. Баатр Адучиевин келсәр, хальмг тохма бод мал йир чанһ чиирг, иим догшн киит сальк даана. Нег үлү иим мал кеер олн өвс шүүж иднә. Эн жил үкрмүдәс сән төль авх санатавидн.

Сүл цагт хөрн градус киитн болсн бәәдл эднд харш болжахш.Артезианск булгд усн бәәнә, малын хот элвг. Малчнр болхла өдр-сө уга завср угаһар иим кемд көдлнә. Сүл өдрмүдт тогтсн көдлмшән улм бүрдәмжтәһәр кехинь некжәнә. Иим кевәр Адуч нертә крестьянск фермерск эдл-ахуд көдләд дасчкв.

Даяна Баранова, Ирчин Алексей