Олн-әмтнә негдлтин байр Элстд темдглв

Әрәсәд олн-әмтнә негдлтин байр темдглв. Өдгә цагин Әрәсән туужд эн байр хамгин баһ наста байр болжана. Энүг хойр минһн тавдгч жилд нег минһн зурһан зун арвн хйордгч жилд болсн йовдлмудын санлд нерәдж бүрдәв. Тиигхд Кузьма Минин болн Дмитрий Пожарскийн һардврт олн-әмтнә церг польшин хортнас Москва балһсиг сулдхсмн. Байрин өдр цуг Әрәсәд олн-зүсн митингуд болн талдан чигн олн улс орлцата керг-үүлдврмүд болв.

Элст балһснд олн-әмтнә негдлтин байрин өдриг дууһар-бииһәр, олн-зүсн һәәхүлмдәр тосж темдглв. Тер тоод келн-улсин сойлын негдлтс энүнд орлцв. Элстихн болн танһчин гиичнр олн-әмтнә уул авьяс-зангшалла, урн һарин эрдмлә болн мана танһчин аһуд бәәх келн-улсин хот-хоолла өөрхн таньлдв. Байрт орлцсн улс дунд шажна болн келн-улсин элчнр керг-үүлдврмүдт орлцв.

Хальмг танһчд Дагестана элчнрин һардач Магомедрасул Умалатовин келсәр, иим байр олн улст кергтә. Хальмг танһч болн дагестана хоорнд бат залһлдан тогтв. Энд дагестана улсин дөрвдгч-тавгдч үйнр өсәд босв. Хальмг танһч олн үртә эк мет дагестана улсиг орулж авв. Эдн көдләд, күүкдән өскәд, сурһуль дасжана. Хальмг танһчин улст ик ханлтан өргжәнә.

Олн-әмтнә негдлтин байрин өдр тогтсн зангшалар Бурхна Экин Казанск шүтәнә шажна байрла ирлцнә. Эн әрүн шүтәг Әрәсәд православн шажна улс ик гидгәр күндлж мөргнә. Элстин болн Хальмгин епископ Зиновий евәләр Бурхна Экин шүтәг Элст балһс эргүләд авч йовв. Эн әүрн шүтәг Казанск чонжд йирн доладгч жилд Москван болн цугәрәсән патриарх хойрдгч Алексий чонж әрүслһнә хөөн бәрүлж өгсмн.

Элстин болн Хальмгин епископ Зиновий келсәр, Хальмг танһч — өвәр һазр. Энд олн келн-улс болн шажна элчнр хоорндан ни-негн бәәнә. Иим бәәдл цаарандан чигн тогтх, делгрлт авх гиж санжана. Элст балһсна, танһчин цуг улст бәәхтә хөвтә жирһл дурджана, цуһар ни-негн бәәтн.

Мана иньглтд мана күчн. Олн-әмтнә ниицәнә делгрлтин күцлд күрхин төлә болн танһчин цуг улсин бәәхтә жирһлин төлә олн-әмтнә негдлт уралан йовлһна хамгин һол таал болжана. Ода Хальмг танһчд йирн келн-улсин элчнр бәәршлжәнә.

Элст балһсна администрацин толһач Артур Дорджиевин келсәр, Ода мана танһчд хальмугд, орсин, даргин, чечен, азербайджан келн улс хоорндан ни-негн бәәнә. Иньглтд мана күчн чидл. Иньглтин кевәр бәәхлә, Элстин, танһчин болн Әрәсән төлә дала олз-туста керг күцәж болх.

Олн-әмтнә негдлтин сән өдр — мана туужиг дурлж, күндлжәх цуг улсин байр болжана. Мана күчн олн улсин негдлтд болн мана орн-нутгин туужд. Энүнә тускар олн улс келж, ду дуулв.

Бевина Мергн, Котина Валерий