Олн халхта цутхлнгин көдлмшиг таасжана

Хальмг танһчд хойр минһн арвн доладгч жил күртл дәкд тавн олн халхта цутхлнг секх зура бәәнә. Городовиковск балһсна улс иим цутхлнгин көдлмшиг таасжана. Энд государственн болн муниципальн туслмжиг ахр болзгт авч болна. Хойр сарин эргцд эн цутхлнгд зурһан зун найн туслмж күрггдв.

Городовиковск балһснд олн халхта цутхлнг зуг хойр сар хооран секгдв. Тер бийнь балһсан әмтн энүнә көдлмшт ижлдәд, таасв. Энүнд района улс ахр бодзгт болн боомтг угаһар кергтә документ һарһж авч чаджана. Тегәд чигн энд оньдин олн күн цуглрна. Людмила Шептырева герин дегтрәс справк һарһулж авхар нааран ирв. Иим справкиг социальн харслһна әнгд орулж өгх кергтә. Социальн харслһна әнгд цуг кергтә документ орулж өгсн хөөн цаажла харһсн күүкд күн ЖКХ-н туслжмин мөнг өглһнд льгото авхмн.

Городовиковск балсһна бәәрн күүкд күн Людмила Шептыреван келсәр, герин дегтрәс документ һарһулж авхар наарн ирж. Энүнд цуг кергтә туслжмиг ахр болзгт күргв. Энд көдлжәх специалистнр цаһан седклтә, көдлшән сәәнәр меднә. Иим ахро болзгт справк өгснь энүнд таасгдв.

Цутхлнг олн улс ирсн бийнь, энд чеерүд цуглрхш. Операционн залд орхин өмн талон авдг терминал бәәнә. Энүнд талоһан авчкад, чеерүд күләнә. Чеерүдин тускар шишлнг табло зәнглнә. Тегә нааран ирсн әмтн үүмлго, эврәннь тойг һарч ирхин күләнә. Цутхлнгин көдлмш нег терзин эв-арһар бүрдәгджәнә. Цуг кергтә операц, цәәлһвр, документ орулж өглһн болн цаас һарһж өглһн нег специалистын медлд бәәнә. Эндр өдрт Городовиковск олн халхта цутхлнгд цуг кергтә специалистнр көдлжәнә. Эдниг бәәрн района цутхлнг селәнәс улсас шүүж авв. Эдн цугтан шишлнг белдвр Элст балһснд һол офист кев. Бәәрн улс эднә көдлмшиг таасжана.

Ода олн халхта цутхлнгд государственн болн муниципальн дөчн туслмж күргжәнә. Специалистнрин келсәр, хамгин олн улс өрк-бүлин ханин туск справк авхар ирнә. Тер мет герин дегтрәс справк олн әмтн авчана, бәәрн һазртан темдглж бичлһнә туск докумет һарһулж авчана. Ода района әмтн олн үртә улст өгчәх һазрин участкиг эврәннь медлдән орулж авлһна документ һарһулж авна.

Городовиковск района олн халхта цутхлнгин специалист Санл Цереновин келсәр, өдр болһн цутхлнгд хөрн-һучн күн ирнә. Олн әмтн бәәрн һазртан темдглж бичлһнә документ һарһулж авхар ирнә. Зәрм әмтнд цуг кергтә цәәлһвр кех кергтә болна.

Олн халхта цутхлнг секснә хойр сарин эргцд энд государственн болн муниципальн зурһан зун найн туслмж күрггдв. Одав цутхлнг танһчин эрүл-менд харлһна министерствла, һазрин болн зөөрин хәрлцәнә министерствла, государственн архивла, алвна болн күч-көлснә инспекцла, балһсна администрацла болн талдан чигн учрежденьсла ведомсвтла өөрхн залһлда бәрж көдлжәнә. Иргчдән олн халхта цутхлнг темдглж бичлһнә церглтлә, алвна, миграционн церглтлә нөкцлт күцәх саната.

Городовиоквск района олн халхта цутхлнгин әнгин ахлач Лилия Баулкина келсәр, ода олн халхта цутхлнг темдглж бичлһнә церглтлә, алвна инспекцла, бәәрн залврин органмудла өөрхн залһлда бәрж көдлжәнә. Эндр өдрт олн халхта цутхлнг дегд олн туслмж күргж чаджахш. Иргчдән энүнә то икдүлх санан бәәнә. района улст государственн болн муниципальн олн туслмж күргх кергтә.

Иргчдән иим олн халхта цутхлнгуд танһчин цуг райодт секх зура бәәнә. Хойр минһн арвн доладгч жил күртл иим цутхлнгуд Лаганск, Баһ Дөрвдә, Яшалтинск, Яшкульск болн Ик-Буурла райодт секх зура темдглж авгдв. Тер мет Элст балһснд дәкәд нег иим цутхлнг секх неквр тәвгджәнә.

Көкән Герл, Очра Сергей