«Одн» заводын көдләч Александр Халушевин ончта өөнд нерәдгдсн мини-футбольн марһан болв
«Одн» заводын ах уйн көдләч Александр Халушевд жирн тавн жилин ончта өөнд хамдан көдлжәх улс сән белг белдж. Энүнә өөнд нерәдгдсн мини-футбольн марһа эдн бүрдәж давулв. Дөрлдәнд зурһан команд орлцв. Дииләчнр болн призермуд дипломсар болн кубокар ачлгдв.
Заводын ветеран Александр Халушевин келсәр, Элтс балһснд ирж бәәршлх гиж санжасн уга. Новосибирск областьд дөчн доладгч жилд Малая Тахта селәнд төрсмн. Энүнә хөөн Халушевин өрк-бүл Волгоградск областьд нүүж ирв. Бичкндән Саша медрл авхар соньмсдг көвүн гиж әмтн келдг билә. Тер тоод техникар икәр соньмсв. Тегәд чигн школан төгсәчкәд, Ленинградск радиотехническ техникумд орж чадв. Энүнә хөөн көдлмшт орв. Александр Халушевин келсәр, Одн заводт далн негдгч жилсә авн дөчн жилдән көдлв. Түрүн авгтан гальваническ цехд тусв, хөөннь ачта амрлһнд һартл заводын мастер болж көдлв.
Ода пенсьт һарсн бийнь александр халушев дурта көдлмштән көдлжәнә. Гертән хара сууж болхш гиж эн келнә. Халушевин келсәр, ода заводын коммерческ әнгд көдлжәнә. Хол һазрт командировкд одх кергтә болна. Альдаран чигн йовулхла йовх зөвтә.
Көдлмшин заагт спортивн наад наадхдан дурта. Александр Сергеевич хамдан көдлжәсн әмтнлә болн нәәжнрләһән хамдан кесг жилдән футбол наадна. Бичкн цагасн авн иим нааднд йир дурта. Энүнд нерәдгдсн марһан энүнә ончта өөнд өвәрц белг болсн деерән, энүнә жирһлин хаалһд байрта йовдл болв. Командын ханьд кесг дәкж танһчин чемпиона нер зүүв. Халушевин тоолврар, футбол наадн олн-зүсн наста болн эрдмтә улсиг негдүлнә.
Футбольн марһанд эн саамд Лаганск, Көтчнрә райодын, нәәмдгч микрорайона. Хамдан нертә команд болн Одн заводын хойр коллектив дииләчән йилһв. Дөрлдән йир зүткәтә болв. Иим марһанд ветеранмуд баһ цагтан авсн дамшлтан үзүлнә. Хамгин сән футболистнр болн призермуд белгүдәр болн мөрәһәр ачлгдв. Дииләчд кубок бәрүлж өггдв.
Ээнән Делгр, Очра Сергей
