Нертә үүлдәч Павел Сангаджиевин дегтр барас һарв
Хальмг Танһчин олна үүлдәч Павел Дорджиевич Сангаджиевин зун жилин өөнд нерәдгдсн керг үүлдврмүд октябрь сард болх. Шидр энүнә дегтрин түрүн үзүлвр болв. Эн дегтрт энүнә урднь барт эс һарсн статьяс болн материалмуд орсн бәәнә. Мана зәнгч бас эн презентацд одв.
Танһчин экономикд, сойлд болн номин халхд Павел Сангаджиевин орулсн ик тәвц тоод авад, энүнә элгн-саднь болн нәәжнрнь тоомсрта күүнә санлынь тодлад, һарсн өдрин ончта өөниг өргәр темдглхәр шиидв. Филолог номин кандидат дегтрин зокьялч Николай Манджиевин келсәр, урдк цагт бичсн тодлврмуд, бичкн зәнг Павел Дорджиевичин кеж күцәж йовсн аһу ик чинртә үүлдврин тускар ил медүлжнә. Давсн зун жилин хөрдгч жилмүдт экләд көдлсн күн Хальмг танһчин босхмжд ик тәвцән орулсн күн болжана. Дөчдгч жилмүдин эклцәр эрдм-сурһулин наркомин үүл дааж йовла. Әмт сәәнәр таньдг болн бәәрн һазрин таал сәәнәр меддг Павел Дорджиевич иим ик дааврта көдлмшт орулгдв. Дәәнә цагт партизанск отрядмуд тогталһнд болн подпольн багмудын үүлдвр зүүцүлһнә төрмүд хаһлж йовсмн.
Киитн Сиврт ик золвнг дааһад төрскн һазртан ирлә. Эн цагт танһчиг шинәс босхж авлһнд бас шунмһа кевәр орлцсмн. Партин обкомин сегләтр болж көдлв, Хальмг АССР-ин министрмүдин Хүүвин ахлачин дарукд шиидгдв. Баснг Бадьминович Городовиковла хамдан эврәннь төрскн һазртан улан залата халмугдтан чидлән нөөлго церглж йовсмн. Санлын асхнд энүнә тускар бүлән үгмүд келгдв. Лидия Лебедеван келсәр, тер цагт харһлтс баһ болдг билә, тер бийнь тер цагин тодлвр ода күртл зүркнд бәәнә.
Танһчин райодын, селәд-поселксин балһсдын туужин тускар кесг көдлмш бичв. Энүнә үүдәврмүд номнрт йир соньн болна. Ода энүнлә хамдан көдлж йовсн улс Сангаджиевин жирһлин адрута хаалһин тускар болн энүнә үүлдврин тускар олн тодлврмуд чееждән хадһлжана. Энүнә көвүн Валерий Сангаджиевин келсәр, кедү көдлмштә болв чигн, эврәннь өөрхн улстан оньдин бүлән үгмүд келж, цаг олж авдг бәәсмн. Тавн үрән өскәд кү кев. Икәр шооддго билә, эврәннь көдлмшәрн зангарн үлгүр болдг билә. Иим кевәр билгтә һардач, өрк-бүлдән һольшг зангта күүнә тускар олн әмтн сәәнәр медж авна.
Ээнән Ольга, Хулхачин Николай
