Некоммерческ организацс мөнгнә мөрә шүүж авв
Хальмг танһчд региона некоммерческ организацсин социальн программ экләд күцәгджәнә. Танһчин марһанд орулж өгсн программ инвалидмудын, экнрин, бичкдүдин, өнчн көвүд-күүкдин болн ветеранмудын төрмүд хаһлх зөвтә. Дәкәд нег тодлад келхлә, хөрн дөрвн дииләч ут-тоодан зурһан сай асрлнг авв.
Үүмәд, аш күләдг цаг төгсв. Некоммерческ организацсин марһан сентябрь сард зарлгдв. Хойр сарин эргцд шишлнг комиссь орулж өгсн төсв шинжлж шүүж авв. Чанһ неквртә шүүврин ашт дөчн хойр төсв орулж өггдв. Энүнә ашт хамгин сән гисн хөрн дөрвн программ комиссь шүүж үлдәв. Дииләчнриг правительствин герт дуудж авад, сертификат бәрүлж өгв. Харһлтд танһчин толһач орлцв. Цуглрсн улсиг йөрәһәд, мана танһчин улсин төрт оньган өгсн седәврч улст Алексей Орлов ханлтан өргв.
Алексей Орловин келсәр, эннь түрүн ишкдл болжана. Мөрә өгхин төлә зурһан сай арслнг йилһж өггдв. Эн жиләс авн марһан сән зангшалд тохрад, жил болһн бүрдәгдх. Мөнгнә мөрән кемжән өсх. Государств эс күцәж чадсн көдлмшиг тадн кежәнәт. Тадн ик тәвцән орулжанат гиж эн келв.
Марһана таалар өнчн бичкдүдиг, экнриг болн бичкдүдиг дөннлһнә, инвалид улст нөкд күрглһнә, ветеранмудын бәәдл-жирһл ясрулһна, немр эрдм-сурһуль делгрүлһнә болн олн улс спортар соньмсулһна социальн программд ик оньг тусхагдв. Экономикин министр Эрдени Болдыревин келсәр, бооца батлж авсна хөөн, мөрән мөнгн дииләчнрин счетд йовулгдв. Ода мөнг авсн организацс темдглсн зураһан экләд күцәж чадх. Некоммерческ организацд иим государственн дөн түрүн болж күрггджәхәс иштә марһанд орлцсн улс танһчин һардачнрт болн правительствд ханлтан өргв.
Мөнгнә мөрән кемжән зун тәвн минһн арслнгас авн һурвн зун минһн арслнг күртл тогтажана. Дети наши нертә буйнч седклин сангин элч Диана Кекееван келсәр, шүүж авсн мөнгиг Уличные тренажеры нертә төсв күцәлһнә төлә йовулх. Спортивн снарядмуд дөрвдгч микрорайонд бәәх “Буревестник” стадионд углж тәвгдх. Энүнд бичкдүд болн бөдүн улс чигн цогц-махмудан батрулж чаджана.
Диана Кеккеван келсәр, бичкдүдән үлдәдг арһ уга экнрт дөн күрггдх. Эдн өнгәр тренажермудт көдлж чадх.
Инвалидмудын ниицәнә ахлач Мергн Кекеевин келсәр, ик кезәнәс авн ухалжасн санаһан күцәж чадх. Цуг инвалидмудыг негдүләд, хамдан олн-зүсн төрмдү хаһлж чадх. Я среди других нертә энүнә орулж өгсн программар социологическ сурһлн кегдх, шинжлт күцәгдх, төгрг ширән сүүр болх.
Мергн Кекеевин келсәр, иим программар эднә организацин интернет-сайт бүрдәх санан бәәнә. Энүнд инвалид улсиг үүмүлжәх төрмүдин тускар бичгдх.
Диилвр бәрсн Признание нертә санг халмьг улсиг цаажла харһулсн һашута өөнин керг-үүлдврмүд орлцх. Энүнә һардач Лариса Лиджиеван келсәр, ах классмудын сурһульчнр дунд үүдәгч марһан болх. Хальмг болн оср келсәр бичсн хамгин сән нүүәрлж бичлһнә көдлмш эрдм-сурһулин министерствин сайтд орулгдх. Тенгрин уйдл нертә өдгә цагин өөрдин сойлын делгрлтин цутхлнг Хальмгин фольклор — бичкдүдт нертә төсв күцәх. Эн программар хойр ботьта Хальмгин тууль барлгдх, бичкдүдин төлә бичжәх бичәчнрин семинар бүрдәгдх. Тер мет Номин туг нертә буддийск цутхлнгд бас мөнгнә дөн күрггдв.
Баатр Мангаевин келсәр, мөнгн угаһар көдлхд йир күнд. Темдглсн зура күцхш. Иим мөнгнә дөн авсн хөөн көдлмш уралан йовх. Буйнч седклин сангудт бүрдәмжин болн мөнгнә дөн күргжәх улст бас мөнгнә дөн крүгхин тускар харһлтын чилгчәр Алексей Орлов келв.
Чучян Валентина, Бадмаран Владислав
