Насни дигт күрәд уга бичкдүд олар цуглрдг һазрар рейд кегдв
Хальмг танһчин МВД-н көдләчнр насни дигт күрәд уга бичкдүд олар цуглрдг һазрар рейд кев. Эдн эн саамд компьютерн клуб, Пюрбеевин уульнцд бәәх кафес, Иньглт пакр бүрткж хәләв. Насни дигт күрәд уга бичкдүд комендантск часин зака яһж күцәжәхин тускар шинжлт кегдв.
Хойр минһн арвн негдгч жиләс авн Әрәсән цуг регионмудт насни дигт күрәд уга бичкдүдин төлә комендатск час орулгдсмн. Хаврин зунын цагт иим кем хөрн һурвн часас авн эклнә, намрин-үвлин кемд болхла хөрн хойр часас авн. Эн цагин хөөн арвн нәәмн нас күрәд уга бичкдүд һаза уульнцд эс гиж олна һазрт бөдүн улс угаһар бәәх зөв уга. Насни дигт күрәд уга бичкдүдин комиссин көдләчнр долан хонг болһн оперативн керг-үүлдвр күцәнә. Энүнә йовудт насни дигт күрхәд уга бичкдүдин бәәдг һазр бүрткж хәләгднә, олна диг-даран харж теткгднә. Комендантск часин зака эвдсн болн әрк-чаһр уужах, талдан чигн аля-азд йовдл һарһжах баһчуд илткж авгдна.
Хальмг танһчин МВД-н олна диг дара харлһна әнгин инспектор Чингис Хазыковин келсәр, һаза сөөһәр йовсн бичкдүд хотл балһсна дотр-дундын кергүдин әнгд күрггднә. Эднлә болн эднә эк-эцкнрлә цәәлһврин күүндвр кегднә.
Эн саамд оперативн көдләчнрин рейд Навигатор нертә компьютерн клуб бүртклһнәс эклв. Энд олн бичкдүд компьюетрн наад кесгтән наадна. Эн саамд зака эвдсн йовдл илткгдсн уга, энд төвкнүн. Энд наад нааджах бичкдүд арвн нәәмн нас күрч. Сокту уульнцд болхла әрк-чаһ хулддг заведеньст шуугата нәр болжана. Хар зөнгдән энд амрчах улсас зөв-йос харлһна органмудын көдләчнр документинь сурдг зөв уга. Кемр эдн олна диг-дара эвдхлә, документинь сурж болх. Насни дигт күрәд уга бичкдүдин насинь йилһж авхд күнд болна.
Хальмг танһчин МВД-н олна диг дара харлһна әнгин инспектор Чингис Хазыковин келсәр, июнин нег шинәс авн октябрин нег шин күртл иим рейд долан хонг болһнд кегдх. Энүнә йовудт административн зака эвдсн йовдлмуд илткж авгдх. Бичкдүдиг зеткртә йовдлмудас гетлүлх күцл тәвгджәнә. Энүнә төлә эк-эцкнрлә цәәлһврин көдлмш кегднә. Эк-эцкнр үрдүдтән чик сурһмж өгхлә, баһчуд зака эвдшго.
Сөөһәр клубд, барт, кафед әрк чаһр уусн насни дигт күрәд уга бичкдүд болн эднә эк-эцкнр засгла харһулгдхш. Зуг эднлә цәәлһврин күүндвр кегднә. Әрк чаһр хулдсн арһлачнр засгла харһулгдна. Иим улсиг һурвн минһн арлснг ялд унһах закан бәәнә.
“Чиндамани” кафен эзн Наталья Чурюмован келсәр, насни дигт күрәд уга бичкдүд кафед ирхш. Энд бөдүн улс ирж амрна. Бичкдүдт әрк-яаһр хулдшго закана тускар меднә.
Эн саамд рейд күцәсн инспектормуд зака эвдсн йовдлмуд илтксн уга. Тер бийнь зөв-йос харлһна органмудын көдләчнрин келсәр, нег сардан насни дигт күрәд уга бичкдүд комендантск часин зака эвдсн һучн-дөчн йовдл илткгднә. Тер мет административн зака эвдсн йовдл сар болһн темдглж авгдна.
Елена Алексенко, Хулхачин Николай
