Насни дигт күрәд бичкдүдт әрк хулдшго закан яһж күцәгджәнә?
Элст балһснд насни дигт күрәд уга бичкдүдт әрк-чаһр хулдшго закан яһж күцәгджәнә? Мана үүдәгч баг МВД-н көдләчнрлә хамдан хулд-гүүлгәнә предприятьмудар рейд кев.
Ода Әрәсәд әрк-чаһрин продукциг зуг арвн нәәмн нас күрсн улс хулдж авч чаджана. Энүнә тускар әрк-чаһрин, тәмкин продукц болн пиив хулдлһна зокалд бичәтә. Эн закаһар насни дигт күрәд уга бичкдүдт әрк-чаһр хулдж болшго. Болв Элст балһснд эн федеральн закаг зәрм арһлачнр күцәжәхш. Эн саамд полицин көдләчнр хотл балһсна микрорайодт рейд кев. Удл уга дулан өдрмүд тогтхла, бичкдүд сул цаган һаза гермүдин өөр давулх. Иим кемд көвүд-күүкд тәмк татна, пиив ууна. Бүртклһнә хулд кехин төлә нег көвүг нөкд болхинь сурвидн. Агчмин зуур нег хулд гүүлгәнә киоскд насни дигт күрәд уга көвүнд әрк-чаһр хулдв.
Эн көвүнә келсәр, әрк-чаһр хулдж авхд күнд болсн уга. Паспорт сурлго пиив хулдв. Арвн нәәмн нас күрәд уга болв чигн, әрк хулдна.
Полицин көдлхчнриг үзчкәд, хулдач эврәннь халхасн зака эвдсән медв. Энүнә ашт полицин көдләчнр протокол бичв. Иим кевәр зака эвдсн күүкд күн һучн-дөчн минн арслнг ял өгх зөвтә. Элст балһсна эн захд насни дигт күрәд уга бичкдүдт әрк-чаһр хулдшго закан көдлжәхш. Хулд кехләрн, хулдачнр әрк-чаһр эс гиж тәмк хулдхларн насни дигт күрәд уга бичкдүдәс паспортын сурх зөвтә. Болв эдн паспорт сурлго хулд кежәнә.
Энүнә тускар хотл балһсна бичкдүд герчлв. Эднә келсәр, Элст балһснд әрк чаһр хулдж авхд амр.
Эн көвүнә келсәр, киоскмудт әрк чаһр хулдж авч болна. Документ хулдачнр сурхш. Эн күкнә келсәр, ямаран чигн цагт әрк хулдж авч болна.
Насни дигт күрәд бичкдүдин кергүдин комиссин инспекцин көдләчнрин болн МВД-н олна хүүвин элчнрин келсәр, хулд-гүүлгәнә һазрар иим рейдмуд келһн — хулдачнриг зака күцәхд сән нилчән күргжәнә. Энүнә ашт насни дигт күрәд уга бичкдүдт әрч-чаһр хулддг йовдл баһрна. Давсн жилин эргцд насни дигт күрәд уга көвүд-күүкдт әрк-чаһр хулдлһна хөрн долан йовдл илткгдв. Иим зака эвдсн хулдачнр һучн минһнәс авн дөчн минһн арслнг күртл ял өгх зөвтә, юридическ улс болхла арвн холванд икәр һурвн зун — дөрвн зун минһн арслнг ялд унх закан бәәнә. Кемр иим кевәр зака кесг дәкж эвдхлә уголовн засгла харһулгдх.
МВД-н насни дигт күрәд уга бичкдүдин кергүдин әнгин ахлач Владимир Анисовин келсәр, иим кевәр зака эвдсн улсин тускар протокол бичгднә, ик ялд унх закан бәәнә. Һучн-дөчн минһн арслнг ял өгнә.
МВД-н статистикин то-дигәр, хулдачнр иим ялас әәжәхш. Эн жилин эклцәс авн полицин көдләчнр бичкдүдт әрк хулдсн тавн йовдл илткв. Насни дигт күрәд уга бичкдүдин кергүдин инспектормудын келсәр, бичкдүдт әрк чаһр хулдхла, эдн дунд зака эвдсн йовдлмудын то өснә. Специалистнрин келсәр, сокту көвүд-күүкд зака эвднә, эс гиж эдн зеткртә йовдлла харһна.
Танһчин МВД-н олна хүүвин гешүн Эдурад Доржиновин келсәр, харм төрхд зәрм хулдачнр зака медлго эс гиж ору авхар бичкдүдт әкр-чаһ хулдна. Иим рейдмуд олз-туста болна.
Иим рейдмудыг полицин көдләчнр дару-дарунь кех саната. Зака эвдсн арһлачнриг болн хулдачнриг улсиг ялд унһахмн эс гиж засгла харһулхмн.
Көкән Герл, Эрнжәнә Эрднь
