Намрин кем хамгин сән баг болна. Зуг хур орад, тенгрин бәәдл үрәв

Хойр өдртән орсн хур гииһәд, эндр нарн һарад чилгрв. Намрин кемиг шүлгчнр болн зурачнр эврәннь үүдәврмүдтән үзүлхдән дурлдг бәәсмн. Элст балһсна әмтн болхла эн цагин тускар олн-зүсн тоолврта.

Намрин тускар орсин нертә шүлгч Александр Пушкина бичсн шүлгүдәс сән болн эн цагин чик кевәр үүдәсн шүлгүд бәәхий? Ода болхла тогтсн тенгрин бәәдл Пушкина бичсн намрин кемлә әдл болжахш. Эн цагт киитн хур орад, тенгр үүләр бүркгднә. Үүрмг хур өдрин дуусн гилтә орна. Иим кемд күн биш мал һазаран һархдан дурлхш. Үүлн тарад нарн гилвкәд һархинь әмтн тенкән уга гидгәр күләнә. Иим кемд чееж хавчгдад, күн гейүртнә. Зуг баһчуд иим кемд далһар зовхш. Сүл өдрмүдт Элст балһснд тогтсн тенгрин бәәдл олн әмтнд әдл биш уха-сана орулна. Эднә келсәр, иим өдрмүдт көдлх дурн күрхш, гертәсн һарх дурн уга болна. Талдан улсин тоолврар, Иим тенгрин бәәдл дегд му. Иим өдрмүд таасгдна, уха тунһахд сән, толһад олн-зүсн тодлвр орж ирнә гиж эн күн келнә. Хур-чиг, салькта өдрмүдт эмчнрт көдлмш икднә. Мацк Басхаева дөчн жилдән терапевт эмч болж көдлжәнә. Иим цагиг йир сәәнәр меднә. Тегәд чигн әмтн өгх селвг энүнд оньдин белн.

Элст балһсна поликлиникин эмч Мацг Босхаеван келсәр, нарн уга бүркг өдрмүдт ультрафиолетин герл күүнд баһ болна, нег үлү медәтә болн бичкдүдт күнд болна. Иим кемд витамин олзлх кергтә, хувцан дулалад, бийән саглхла сән болх. Намрин цагт өөшгин, зүркнә гемтә улст күнд. Тер мет ясн шарклдг улст амр биш болна гиж эмч келнә.

Күн болһн манһдур-нөкәдүр ямаран тенгрин бәәдл болхин тускар медж авхар оньдин зүткнә. Өдгә цагт маднд синоптикүд сән дөн болна. Хальмгин гидрометеоцутхлнгин көдләч Надежда Мучаеван келсәр, эн долан хонгин чилгч күртл хур орх. Салькна күчн чанһрхмн. Танһчин ар үзгин райодар аһарин кемжән ноль градус күртл киитрх.

Ирх өдрмүдт ямаран тенгрин бәәдл болхин тускар медж авчкад, эмчнрин селвг оньгтан авад, бидн дулан хувцан белдж авх кергтә. Юнгад гихлә, хур гииһәд, дарунь ноябрь сард киитрх цаг хол биш.

Хавтхна Элла Колдан Церн