Мобильн телефо хулхалдг йовдлмудын то баһржахш
Мобильн телефо хулхалдг йовдлмудын то баһржахш.Әрәсән залһлдана болн олна коммуникацин министерств эн халхар мана орн-нутгин улсиг харсх саната.
Давсн жилд Эльза Саряева һурвн телефо сольв. Нег дәкж энүнә сумкас телефоһинь хулхалж авч. Хойрдгч мобильникинь һаза уульнцд булаж авсн бәәж, һурвдгч телефог болхла Элстин ресторанд нег күн чидл үзүләд, телефоһинь булаж. Хулдад өгсн эс гиж телефоһан геесн әмтн мобильникан олж авхд йир күнд болна. Тегәд зәрм әмтн полицд энүнә тускар эрлһ орулж өгхш. Элст балһсна улсин келсәр, иим кеәвр зака эвдсн улсиг чанһ засгла харһулх кергтә. Тиихлә хулха кедг улсин то баһрхмн.
Хальмг танһин дотр-дундын кергдүдин министерствин барин сегләтр Эльвира Намруеван келсәр, иим кевәр уульнцд зака эвдсн йовдлмуд дунд мобильн телефо хулхалдг йовдл статистикин то-дигәр олн. Энүнәс иштә мобильн техникхулдлһна кергиг чанһ бүртклһнд авх зура бәәнә. Эн халхар Әрәсән орн-нутгин Хүүвин депутатнр шишлнг зака белджәнә.
Шин зокалар, мобильн телефон болһнд өвәрц кевин тойг тәвгдх. Эн тойг шишлнг реестрт орулгдхмн. Үлгүрнь, кемр танас мобильн телефо хулхалж авад, хулхач эврәннь сим-карт тәвәд, нег дәкж жиннүлхлә, тиигхлә зөв-йосна органмуд операторар дамжулад, хулхалж авсн телефон кенә нернд бичгдсн тускар медж авх. Хулхалж авсн телефог олж авч болхмн. Ода иим дамшлт Украинд болн Великобританьд олзлгджана. Урднь Әрәсән депутатнр иим зака батлж авх зурата билә. Шин закан туслхий аль уагй? Цаг медх.
Санкун Кермн, Очра Сергей
