Мек-тах кедг улс Танһчин әмтнд олн-зүсн СМС мобильн телефонд йовулна

Тадн өнгәр үнтә маши шүүж авхдан дуртавт аль угай? Эн халхар ода мана танһчин әмтнд мобильн телефоһар СМС иржәнә.

Мана танһчин әмтнд олн-зүсн СМС мобильн телефонд ирнә. Иим кевәр мек-тах кедг улс эврәннь интернетын хайган үлдәнә. Мана үүдәгч баг энүнд орад, иим зәнг бүрткж хәләвидн. Иим зәнг маднд алнг болв. Негдвәр иим сайтд кедү күн бәәх тоолдг счетчик мадниг алмацулв.

Өрәл сай арслнга маши белглжәх компаня сайтд зуг хойр күн бәәж. Нег үлү эн компаня тускар тас зәнг бас уга болв. Маши шүүж авсн әмтн мек—тах кедг улсин зәнгәр, машина үнин нег процентин мөнгиг орулж өгх зөвтә. Эннь дөчн тавн минһн арслнг болж һарчана. Мана үүдәгч баг дәкнәс эднә сайтд орад хәләв. Наши партнеры нертә әнгд дала нөкднр бәәнә. Тер тоод ик банкс, сотов оператормуд, социальн сетьмуд бәәнә. Аштнь иим кергиг мек-тах кежәсн әмтн күцәжәсн ил медгдв. Тегәд танһчин МВД-н көдләчнрәс цәәлһвр авхар седвидн. Иим халхар зуг нег йовдл полицин көдләчнр илтксн бәәж. Эн саамд мек-тах кедг улс тас талдан эв-ар олзлж. МВД-н барин церглтин һардач Эльвира Намруеван келсәр, иим ик мөрә — үнтә маши интернетар авч болшго. Иим улст иткх керг уга.

Зәрм әмтн тас өнгәр ик мөрә шүүж авх саната. Эн кемд меклгдсн әмтн бас һарв. Хальмгин тәвн наста бәәрн күн эднд меклгдв. Эврәннь нерән келсн уга. Дәкәд нег күн бас меклгдсмн. тер тоод нег күүкд күн бас иим өнгәр өгчәх мөрә авхар седв. Эльвира Намруеван келсәр, һурвн күн ут-тоодан тәвн долан минһн эврә мөнгән йовулж. Эдн полицд ирәд зәнг өгв. Ода эн халхар хәәвр кегджәнә.

Өдгә цагт әмтн саг бәәнә. Тер бийнь аферистнр хара суужахш. Әмт меклхин төлә эдн шин эв-арһ ухалж авчана. Тегәд эврәннь мөнгән саглтн гиж таанрт дуудвр кежәнәвидн.

Димтрий Ивахненко Хулхачин Николай