МЧС-ин сурһуль болв
Эндр Хальмг танһчд бачм чинртә йовдлын таалд көдлдг негдсн гсоударственн системин залврин органмуд, чидлмүд болн эв-арһин үүлдврин дамшлтын сурһуль төгсв.
Хальмг танһчин харсачнрин хойр өдрин сурһуль йиртмжин болн техногеннн чинртә бачм чинртә йовдлмудын таалд көдлдг цугрәсән дамшлт хоршалһна сурһулин әнгнь болв. Түрүн девснгд Хальмгин МЧС-ин әнгс болн РСЧС-ин танһчин системин органмуд залврин органмудт докья өглһнә, көдләчнриг цуглулһна болн шишлнг техник белдлһнә көдлмш күцәв. Түргн ахр болзгт белдвр кехин төлә МЧС-ин чидлмүд болн техник һарв, аэромобильн әнгин шишлнг лагерь бүрдәгдв. Өгсн домгар хальмгин харсачнр самолетар бачм чинртә йовдлд көдләд, хам-хоша бәәх Волгоградск областьд дөн болхар һарч йовв.
Дамшлтын көдлмшин хойрдгч девснгд Элстин аэропортын аһуд йиртжмин тьүүмр унтралһна үүлдвр күцәгдв. Энүнд шавтсн улст нөкд болхин төлә болн бачм чинртә йовдлын таалд көдлхин төлә зеткртә йовдл учрсн һазрт шишлнг техник, түүмр унтралһна болн харсачнрин әнгс, полицин көдләчнр, медицина катастрофин цутхлнгин эмчнр, Элст балһсна болн Целинн района эврә дурар үүлддг түүмр унтралһна дружинмуд һарч йовв.
Хальмгин МЧС-ин ахлачин негдгч дарук Александр Кошель келсәр, сурһульд зун тәвн күн орлцв, һучн хйор техник көдлв. РЧС-ин хөрн долан күн ирв. Целинн района аһуд аэропортын өөр түүмр унтралһна көдлмш күцәв. Тер мет Волгоградск областьд йовхин төлә МЧС-ин көдләчнр самолетд суух дамшлт кегдв.
Сурһулин йовудт бачм чинртә йовдлын таалд көдлдг негдсн государственн системин цуг чидлмүдын хоорндк хамцу нөкцлтин дамшлт кегдв. Эн көдлмш сән чинртәһәр болн бүрдәмжтәһэр кегдв, шавтсн улст цуг кергтә дөн күрггдв.
Хальмгин МЧС-ин ахлачин негдгч дарук Александр Кошель келсәр, иим ки сурһуль жилд хойр дәкж бүрдәгднә. Энүнә йовудт МЧС-ин болн РСЧС-ин көдләчнр хамцу үүлдвр күцәһәд, даалһвр хамдан күцәдг дасна. РСЧС-ин көдләчнрт хамдан ни-негн көдлснд ханлтан өргжәнә. Өгсн цуг даалһвр сән чинртәһәр болн цаглань күцәгдв.
Иим сурһуль цуг специалистнрин эрдм делгрүлһнд болн кергтә дамшлт хоршалһнд сән нилчән күргнә. Харсачнр баатр-зөрмг кевәр көдлхлә, зеткртә йовдл һарһсн улс эднд иткәд, харсж авх гиж нәәлнә. Бачм чинтә йовдлд иим сурһмж ахр болзгт нөкд болх кергтә дамшлт өгнә.
Бевина Мергн, Эрнжәнә Эрднь
