Март 1З танһчин улс Көглтин Даван йирн жилин өөн темдглх
Март сарин арвн һурвнд мана танһчин улс хальмгин хәәртә үрн Көглтин Даван йирн жилин өөн темдглхмн. Байрин өдрин өмн өдргнд олн зүсн керг-үүлдврмүд бүрдәж давулгжана. Шидр Элст балһсна З-гч школын ул деер литературн байр давв. Энүнд Көглтин Даван шүлгүдт болн үүдәврмүдт дурта кесг улс ирв.
Көглтин Даван йирн жилин өөнд нерәдгдсн харһлтд сурһульчнр олн-әмтнә шүлгчин үүдәврмүдиг умшад, цуглрсн гиичнриг, багншриг болн эк-эцкнриг байрлулв. Арвн наста сурһульч Джушхина Андрей давулдг керг-үүлдврмүдт дангин орлцна, тегәд эн өдр бас эврә билг-эрдмән үзүлв.
Эн керг үүлдврт дөрвн илгәлһәр зун тәвн көвүд күүкд марһлдв. Энүнд болхла бичкдүд нертә бичәчин бичсн шүлгүд болн үүдәврмүд чеежәр дасч келж өгв. Залд цуглрсн сурһульчнр болн гиичнр бичкдүдиг оньган өгч сонгсв.
Татьяна Михеева эн бичәчин бичсн шүлгүдт йир дурта киитн Сиврт бәәхдән Көглтин Давала таньлдж, терүнә үүдәврмүдт седклән өгв. Ода терүгән дорас өсч йовх күүкд-көвүдт зааж өгхәр зүткнә. Дорас өсч йовх баһчуд Көглтин Даван үүдәврмүдәр соньмсна, тегәд эн билгтә шүлгчин нернь кезә чигн мартгшго-гиж хальмг танһчин аристк Татьяна Михеева келж өгв.
Эн ик чинртә керг-үүлдврт орлцхар олн әмтн хурлдв. Элгн-саднь, үүрмүднь, хамдан көдлж йовсн бичәчнр-шүлгчнр болн дорас өсч йовх баһчуд ирв. Цуг хурсн әмтн алдр нертә Кугультиновиг тодлад, эн күүнә хальмгин литературт орулсн аһу ик нилчин тускар келв. Жирлһин күнд хаалһдан Давид Никитич эврәннь келн-улсин зовлнгиг хувалцв. Энүнә үүдәлт үнн-чик кевәр жирһл үзүлгджәнә. Энүнә шүлглән гүн ухан-саната болсн деерән, күмн әмтиг туурулжах халх бас болжана. Энүнә бичсн үүдәврмүд кедү жил давв чигн олн әмтнә йоста омг болад үлдх. Көглтин Даван йирн жилин өөнд балһсна литературн байрин ашар диилвр бәрсн сурһульчнр күндллһнә һашгар болн димломар ачлгдв. Кедү жил давв чигн Көглтин Даван үлдәсн үүдәврмүд мана цуг улст алтн болсн зөөр болад үлдхнь маһд уга.
Татьяна Дмитриева, Владислав Бадмараев
