Мана телеүзүлврт хәләсн зургт хойр күүкд күн бийән таньв
Хальмгин телевиденя дөчн тавн жилин өөнин өмн өргнд мана телеканалын "Бийән тань" нертә керг-үүлдвр цаг ирвәс күч авчана. Хуучн зургудт бийән таньсн улс мана редакцд дару-дарунь жиннүлдг болв. Эндр мана үүдәгч баг СССР-ин Деед Хүүвин сунһврт орлцсн әмтнә харһад күүндв. Тер цагас авн Вера Горяева болн Ольга Николаева салһж болшго нәәжнр болв.
Эн зургудт хйор баһ наста күүкд сунһврт ирсн улсиг темдглж бичж авад, эднд бюллетеньмүд бәрүлж өгчәнә. Шинкн арвн нәәмн нас күрсн көвүн хамгин түрүн болж сунһврт ирәд, эн хойр күүкнә өөр зогсв. Иим кевәр эдниг зургт цокж авч. Вера Горяева болн Ольга Николаева дөчн жил шаху хамдан проектн институтд көдлжәнә. Эдн хамдан телезургт орж. Нег минһн йисн зун далн нәәмдгч жилд СССР-ин Деед Хүүвд сунһврин өдриг эдн ода күртл йир сәәнәр тодлна. Тер цагт хойр күүкн сунһлһна комиссин ханьд көдлжәсмн. Вера Горяеван тодлсар, тиигхд эдниг йир эрт зурһан часла босхж авла. Тер цагт сунһвр өрүн зурһан часас авн эклдг бәәсмн. Комсомольск даалһврта күн удан унтх зөв уга болдг билә. Вера Горяеван келсәр, цуг обшежитин баһчудыг цуглулв. Хойрдгч-һурвдгч давхрт бәәсн күүкдиг бас дуудв. Тохянта белдвр кедг бәәж, юнгад гихлә комсомольск даалһвриг эрк биш күцәх кергтә билә.
Ода нәәж күүкд һучн һурвн жил хооран кевтә институд инженер болж көдлжәнә. Вера Горяева газин сурвлжна тосхлтын төсв кежәнә. Хальмг танһчин хол селәдин әмтн энүнд ик ханлтан өргнә. Юнгад гихлә, инженер Горяеван нилчәр селәд-поселкст кимд түлән ирв. Хальмгин телеүзүлврәр, эдниг үзүлсн тускар хамдан көдлжәсн күүкд күн түрүн болж зәнглв. Ольга Николаева тер зургиг эврән үзсн уга.
Энүг телевизорар таньсн әмтн жиннүлсн бәәж. Ольга Николаеван келсәр, хамдан көдлжәсн күн жинүүләд, иим зәнг тархав. Эврән телевизорар зург үзсн уга бәәж. Тер цагт өмссн киилгән ода күртл сәәнәр тодлна.
Тер цагас авн эн хойр күүкд күн олн-зүсн сунһврт комиссин гешүд болж көдлсмн. Тер цагт сунһлһна йовуд тас талдан билә гиж эдн келнә. Тиигхд сунһврт бүрткәчнр ордг билә, зуг нег парть бәәсмн. Өдгә цагт болхла демократин чинрәр политическ үүлдвр болжана.
Тер бийнь комсомолын баһ дүүвр цагнь хамгин сергмжтә болн байрта кем билә гиж нәәжнр тоолжана. Тегәд Бийән тань нертә керг-үүлдврин йовудт телевизорар бийән үзхлә бас соньн болв.
Татьяна Дмитриева, Колдан Церн
