Магистрант Настаев мал услдг эв-арһ үүдәжәнә

Хальмгин университетд оютнрин өдгә цагин некрвлә ирлцәтә төсвин үүлдврт онц оньг тусхагджана. Танһчин деед сурһулин инженерн-технологическ факультетин магистрант Сергей Настаев «УМНИК» нертә марһанд грант шүүж авв. Ода билгтә баһ наста номт эврәннь программан экләд күцәжәнә. Энүнә тускар тодрхаһар мана сюжетд келгджәнә.

Сергей Настаев мал услхин төлә нарна күчәр ус һарһж авдг шин эв-арһ үүдәжәнә. Германьд оютнрин программар дамшлт хоршажасн кемд иим ухан-санан орв. Хальмгин университетин инженерн-технологическ факультетин хойрдгч курсын магистрант Сергей Настаевин келсәр, Германьд сурчасн кемд иим эв-арһ үүдәх санан орв. Тенд иим эв-арһ маднд үзүлсн билә.

Эн ухан-санаһар зүүһәд, гер талан хәрж ирв. Номин болн инновационн баһчудын марһанд орлцад, грант шүүж авад.эврәннь программан эклх арһ учрв. Мана танһчд иим эв-арһ кергтә. Юнгад гихлә, өдгә цагт мана танһч электрокүч хам-хоша бәәх регионмудас хулдж авна. Электрокүчнә тариф ик болад, мана танһчд кеж һарһдг ямаран чигн продукцин үн ик болна. Сергей Настаевин келсәр, нарна күч олзлад, кимд электрокүч авч болх.

Магистрант Сергей Настаевин программин һардач Тамара Манджиеван келсәр, нарна күч олзлад, хальмгин малчнрин хошмудт олна мал услдг төр хаһлдг керг күцәж болх. Хальмгин университетин агроинженерин кафедрин доцент Тамара Манджиеван келсәр, Сергей тәвсн күцлдән күргдг күн, теслттә, кесг цагтан библиотект бәәнә. Иим билгтә седвәрч баһчуд мана танһчд ик олз-тус күргх гиж Манджиева келнә.

Сергей Настаев иим төсв экләд күцәснь Тамара Манджиевад алнг болсн уга. Негдгч курсас авн билгтә оют шинжлтын үүлдвр күцәж, олн-зүсн номин конференцд орлцдг билә. Тер мет хйордгч деед сурһулин эрдм дасв, Бумбин орн келн-улсин ансамбльд орлцна. Эннь Тамара Владимировнан тоолврар, Сергей Настаев олн халхар билгтә күн гиж келж болх. Өдгә цагт олн зүсн эрдәмр соньмсдг баһччуд иргчдән сән үзмж бәрж чадх. Эннь цагин неквр болжана.

Санкун Кермн, Очра Сергей