Лагань балһснд шин чонж байрин бәәдлд секгдв

Лагань балһснд дәкәд нег байр болв. Көк тенгсин һолын көвәд бәәх балһснд шин чонж байрин бәәдлд секгдв. Келхд, эн байрта йовдлыг православн әмтн арвн жилдән күләжәсмн. Лаганя улст шин чонж он чинр зүүжәнә. Юнгад гихлә, православн шин тосхлт Николай Угодникин нер зүүжәнә. Эн әрүн Бурхн заһсчнрин харул-хааһул гиж тоолгдна.

Шин чонж әрүслһнә авьясиг Хальмг танһчин архиерей күцәв. Тогтсн авьясар түрүләд оин алтарь әрүслгдв. Энд әрүн улсиг цогцин шүтән бәәнә. Энүнә хөөн шин чонжиг ладанар, әүрн усар болн миррар әрүслж цеврлв. Байрин шажна керг-үүлдврт орлцсн әмтн шин чонж эргәд йовцхав. Епископ Зиновий келсәр, шин чонж әрүслгдв, энд умшсн маань Бурхнд күрх.

Хойр зун күн багтх чонжд эн өдр олн улс цуглрв. Эннь бас учрта, юнгад гихлә, лаганя православн әмтн эн байрта өдриг кесг жилдән күләсмн. Лаганя улсин байрин медж болх. Юнгад гихлә, шин чонж шажна тосхлт болсн деерән, Көк тенгсин көвәд бәәх балһсна сойлын цутхлнг болжана. Шин хонх, хуучн чонжас авч ирсн әрүн шүтән талдан шинәс авч ирсн шажан цуг кергтә тоотла ирлцв. Келхд, Хальмгин болн Элстин епископ иконостас белглв. Епископ Зиновий келсәр, эн шүтәг шин чонжд белглх шиидвр авгдв, эврәннь деерәс, Хальмг танһчин толһач Алексей Орлов әүрн Богородицин шүтә белглжәнә.

Лаганя православн чонжин тосхлт хойр минһн һурвдгч жилд эклсмн. Энүг бәрхд бәәрн улс, Хальмг танһчин болн хам-хоша бәәх регионмудын арһлачнр мөнгнә тәвәцн орулв. Эн тосхлтын седвәр татсн улсин дунд Александр Белов йовна. Тосхлтын йовудт эн күн кесг дәкж мөнгнә тәвцән орулсмн. Александр Беловин келсәр, тосхлт күндәр кегдв. Мөнгн күртлго зовлнг болад бәәв. Кирсан Илюмжиновин өгсн мөнгн цугтан олзлгдв. Хойр зун тәвн минһн арслнг төсвин документац келһнд йовулгдв, үлдснь мөнгн чонжин ул бәрлһнд олзлгдв. Үлдсн көдлмш күндәр кегдв.

Ут-тоодан чонжин тосхлтд тавн сай арслнг һарв. Болв арһлачнр һарсн мөнг тоолжахш. Орсин православн шажна номар һазр деер чонж тосхн күн сән харул-хааһулта болх.

Азыда Надежда Жамбин Дмитрий