Лагань балһсна 52 күн шин герт нүүж орхар хойр жилдән күләжәнә
Лагань балһснд хуучн герт бәәх тәвн хойр күн шин хөрн патьрта герт нүүж орхар хойр жилдән күләжәнә. Эн жилин декабрин нег шинд тосхлтын организац шин гериг эдлврт орулх зөвтә бәәсмн. Оржах шин жилд әмтн шин бүүрт нүүж орхий аль угай?
Галина Скоробогатова һурвдгч багин инвалид. Өдр болһн кесг дәкж хуучн давшурар йовх кергтә болна, иим давшур йир әәмшгтә, нег цагт хамхрад унж одх бәәдлтә. Тәвн жил хоорна бәрсн герр ода бәәцин таал тас уга. Нег үлү, энүнә патьрт герин ораһар дусал дусснас көлтә чиг хурад, эрсн болн мебель үржәнә. Эн герт әмтн бәәж чадшг гиж шишлнг комиссь шиидв. тегәд энд бәәсн әмтн шин бүүрт нүүж орхар тенкән уга гидгәр күләжәнә. Давсн жилин октябрь сард Лагань балһснд шин гер экләд тосхв. Тегәд шин жилд хуучн герт бәәх улс шин герт нүүж орх гиж санжала. Болв тосхлт удандан саагджана. Галина Скоробогатован келсәр, эн гер ода тосхгджана. Зуг дегд удандан бәргджәнә. Кергтә аппаратур ода чигн уга. Энүнә учрин тускар меддг арһ уга. Тосхачнриг мел өдр болһн йовад бүрткхд эвго. Тегәд шин жил күртл шин бүүрт ордг бәәдл уга гиж эн келнә.
Гер тосхжах организац эн жилдин декабрь сард шин гериг эдвлрт орулх зөвтә бәәсмн. Эн байрта зәнгиг ик кезәнәс авн күләжәнәвидн гиж Скоробогатова келнә. Зуг эдн шин ода деерән нүүж орж чадшго гисн зәнг эдниг икәр һундав. Һурвн давхрта герин тосхачнр эн жилин чилгчд эдлврт орулх шин болзг заав. Энүг тосхжах организацд цуг кергтә мөнгнә өрәлинь долан сай арслнг мөнг йилһж өгч. Эн закана некврәр хөрн процент дик болжана. Болв тосхлтын кооператив цуг кергтә мөнгиг ода некжәнә. Танһчин ЖКХ-н болн энергетикин министр Нелли Ткачеван келсәр, тосхлт йир күнд болжана. Энүнә учрнь иим — социальн патьрин нег дөрвлжн метрнь мана танһчд рынкин үнәс кимд болжана. Нег үлү, тосхлтын организац нег дөрвлжн метринь хөрн негн минһн арслнгин ормд арвн тавн минһн нәәмн зун арслнгар бәржәнә. Тегәд эдн даалһвран күцәж чадлго күнд бәәдлд тусв. Эн төриг чанһар бүрткжәнәвидн. Удл уга гер эдвлрт орх гиж министр иткүлв.
Министерствин өгсн зааврин хөөн, тосхачнр көдлмшән цаарандан кев. Зуг эдн кергтә мөнг күләлго, эврәннь мөнгән һарһад көдлжәнә. Тегәд эн хурц төр хаһлхин төлә района болн Лаганя администрац дөн күргжәнә. Зуг шин жил күртл гер эдлврт орхий аль уга, медгджәхш. Кемр эн гер эс тосхгдхла, мана танчһд ЖКХ-н халх шинрүлһнә кергт дөн күрглһнә санг хуучн нурад унжах гермүдәс әмтн шин патьрьт нүүж орулһна программиг мөнгәр тетклһиг зогсах шиивдвр авхар зәнглв. Тосхачнр темдглсн шин болзгт гер эдлврт орулсн бийнь, тосхлтын чинрнь му болх гиж бәәрн улс тоолжана.
Азыда Надежда, Жамбин Дмитрий
