Көк тенгст хаврин кемд заһс бәрлһнә көдлмш эклв
Хальмг танһчд хаврин кемд заһс бәрлһнә көдлмш эклв. Көк тенгст өмн үзгәс ар үзгүр түрсән хайхар заһсн иржәнә. Заһс бәрлһнә кемд жил болһн браконьермуд тенгтс һарч, зөв угаһар заһс бәрнә. Көк тенгсин ар үзгт болн Ижл һолд иим улсла хальмг танһчар болн Астраханск областяр ФСБ-н пограничн заллтин көдләчнр ноолда кежәнә.
Дигтә нег жил хооран Әәдрхн балһснд манач пограничн кермсин бәәршлдг пункт секгдсн билә. Ода эн пункт Әрәсәд хамгин сән болн өдгәц агин некврлә ирлцәтә гиж тоолгджана. Астраханск областьд болн Хальмг танһчд тенгсин көвә харслһна әнгсин үүлдврин төлә цуг кергтә тоот пунктын аһуд бәәнә. Административн герт шишлнг оборудованьта классмуд бәәнә, тир, машидын боксмуд, кермс яслһна мастерской, водолазн станц, кермс бәәршлх причал бәәнә.
Эндр пограничн отрядын водолазмуд Аслан Бисемалиевд болн Ренат Баткаевд кеж күцәх көдлмш дала. Тенгст һарч йовх цуг кермсиг хәләж бүрткх кергтә. Специалистнр эврәннь кергән сәәнәр меднә. Түрүләд эдн цуг прибормудан бүрткж хәләнә, энүнә хөөн усн дор орж көдлх кергтә. Кермс тенгст һарч йовхин өмн эдн усн дор орад, кермсин йорал бүрткж шинжлнә. Киитн болн харнһу уснд эдн һучн минутас авн кесг частан бәәнә. Инструктор, водолазн специалист Аслан Бисемалиевин келсәр, кермин йорал шинжлж хәләснә ашт дуту-дундс илткгдсн уга. Усн дотр цуг юмн сәәнәр үзгднә. Керм тенгст һарч йовж чадх.
Пограничн церглтин көдләчнр межә харслһна шин техническ эв-арһ олзлжана, өдгә цагин некврлә ирлцәтә бу-селм, залһлдана эв-арһ энд бәәнә. Пограничн отрядын водолазн станц Әрәсәд иим ор һанцхн станц болжана. Водолазн станцин ахлач Анатолий Афанасьевин келсәр, хамгин түрүнд водолазн барокамер шинжлх кергтә. Эннь заллтин пункт болжана. Энүнә хөөн ки өгдг станц ик чинр зүүнә. Эн халәар медрл авхд иим стацн туслна.
Тенгсин көвә харслһна пограничн отрялын һол күцлнь — Көк тенгсин ар үзгин әнгд болн Ижл һолын салврин һазрт браконьерск үүлдвр гетлүлһнә төр болжана. Пограничн отрядын ахлач негдгч рангин капитан Виталий Козлюк келсәр, браконьермудыг бәрж авхла, эдн ик һаруд унна, кесг онһц болн олн дууна гөлм илткж авгдна.
Хальмг танһчар болн Астраханск областяр ФСБ-н пограничн заллтин пограничн отрядын ахлач Виталий Козлюк келсәр, мана отрядын катермуд хамгин түрүн Көк тенгсин ар үзгин көвә харсж хәләжәнә. Хальмг танһчин аһуд Көк тенгсин көвә бас бүрткж хәләжәнә. Отрядын медлд олн керм бәәнә. Эн тооһар тәвсн даалһвран күцәж чадхвидн.
Көк тенгсин ар үзгин әнгд Хальмг танһчин болн Астраханск областин аһуд государственн межә харслһан төлә дарани рейдт һарч йовхдан пограничн отрядян манач керм белн болв. Манач керм тенгст нег долан хонгас авн нег сар күртл бәәнә.
Бевина Мергн, Бадмаран Владислав
