Күүкд улсин байрт ямаран белг хулдж авхмб?

Күүкд күн болһна хамгин сергмжтә байр Мартын нәәмн өөрдж йовна. Ода Элст балһсна әмтн ямаран белг белдхин тускар ухалжана. Нарта-делкән күүкд улсин байрин өмн өргнд мана үүдәгч баг хотл балһсна магазидт одад, ямаран белг хулджахин утскар соньмсв.

Өвәрц, соньн болн кергтә белг. Иим санатаһар Элст балһсна бәәрн күүкд күн Анастасия Завезен эврәннь нәәждән балг шүүж авв. Аштнь цецгән бәәдлтә цаһан мөнгн билчцг хулдж авч. Тер мет Анастасия талдан өөрхн улстан болн элгн-садндан белгүд хулдж авв.

Анастасия Завезен келсәр, нурһлж кеерүл хулдж авна. Дәкәд болхла зургуд бас белглж болх. Экдән болн ээждән цецгүд белглнә.

Күүкдин хамгин дура нәәжнрнь бриллианмуд гиж келгднә. Ювелирн магазина нег хулдач Надежда Олйеникован келсәр, мартын нәәмнд байрин белг гиж әмтн кеерүл хулдж авна.

Ювелирн салона хулдач Надежда Олейникован келсәр, залу улс алтн кегдлмүд дурлж хулдж авчана. Үнтә эрднь чолунта сиик авна, цев болн буһу бас авна. Байрин өдрмүдт үн кимдрв. Аштнь лотерей болх.

Байрин өдр залу улс күүкд улстан цецгүд белглдг авьяс сән зангшалд тохрв. Көдлмшч өдрмүдт цецгүд дегд үнтә биш. Болв байрин өдрмүдт эднә үн кесг холванд өснә. Цецгүд хулддг улсин тоолврар, күүкд улсин байрин өдр хамгин олар залу улс оошг цецгүд болн бамб цецг хулдж авх.

Цецгүд хулддг Людмила Лавренко келсәр, ода бамд цецгүд дала, гиацинты болн азалия цецгүд бас хулдж авчана.

Күүкд улс белг гиж өлгц, косметик болн парфюмерн кегдлүмд дурлж авна. Болв залу улс эднд ямаран оньг тусхахнь күүкд улсиг байрин өдрмүдт үүмүлжәнә. Залу улст болхла эн өдрмүдт амр биш керг күцәх кергтә. Белг шүүж авад, дурта күүкд улсан альдаран авч одхин тускар ухалх кергтә.

Эн залу күүнә келсәр, экдән болн эгчдән ямаран белг кергтәнь меднә. Эн халхар үүмжәхш. Эн көвүнә келсәр, ямаран белг белглхән шүүж авад уга. Цәә уудг ааһ-сав эс гиж түнгрцг белглх санан бәәнә. Эн залу күүнә темдглсәр, гертә байрин ширә белдәд, күүкд улсан йөрәнә. Эн залу күүнә келсәр, тогтсн авьясар цецгүд белглх зурата. Дәкәд парфюмерн белг кех кергтә.

Байрин өмн өргнд парикмахерскйин салонд олн улс чеерүдт зогсжана. Күүкд улс урдаснь парикмахерскийн салонд орхар бичгднә. Толһаннь үсән хәәчлх кергтә, хумсан кеерүлх төр бәәнә. Элст балһсна күүкд улсин келсәр, мартын нәәмнд залу улстан таасгдх зөвтә. Зәрм күүкд улс цецгүдәс болн белгәс залу улсин талдан йөрәл күләжәнә.

Эн күүкнә келсәр, цецгүд белглхлә, байрлх. Эн күүкд күүнә темдглсәр, бичкдүд эк-эцкнртә оньг тусхах зөвтә. Эннрь хамгин әсн белг. Эк-эцктән дуран өгх зөвтә. Эдниг күндлх зөвтә.

Дурта күүкд күүндән, экдән, ээждән, эгчдән ямаран блег кехин тускар залу күн болһн эврән ухалх зөвтә. Болв хамгин сән белгнь — күүкд улст оньган тусхаж, байр үүдәх кергтә. Эннь хамгин үнтә бриллиантас сән болх.

Ээнән Делгр, Хавтхна Анатолий