Келн-улсин театр шин наад белджәнә

“Здравстуйте, я ваша теша!” Иим нерәдлһтә наад Хальмг танһчин нертә режиссер Сергей Бурлаченко белджәнә. Драматург Сергей Беловин бичсн шог наадыг танһчин хәләһәчнр февралин нег шинд үзж чадх.

Иим кевәр шин шог наадна үүлдврнь эклнә. Наадна һол дүрнь — һуч һарсн күүкд күн. Кесг жилдән байн арһлачла хамдан бәәнә. Йосн кевәр мордад, энүнә авальнь болх саната. Зөвәр цаг давсн хөөн, байн арһлач хүрм кех зөвшәл өгнә. Зуг нег неквр тәвнә. Эврәннь иргч хадм эктәһән таньлдх зурата. Хадм эклә таньлдад, ямаран күүкд күүһинь медж авх саната. Альмн ишәсн холд ундмн биш эн санжана. Болв энүнд нег хурц төр боомтг болжана. Күүкнә экнь түүрмд сууна. Тегәд эврәннь иргч авальдан энүнә тускар күүкн келхәр седжәхш. Болв иргч авальдан хулд бас келхәр седхш. Тегәд эн хурц төрәс күүкн эврән һархар шиидв. Һаза генткн таньлдсн нег күүг иргч хадм экин дүр наадхинь сурна. Эннь актер күн. Режиссер Сергей Бурлаченкон келсәр, энүгәрн шог наадна үүлдвр төгсхш.

Шог наадна режиссер Сергей Бурлаченко келсәр, күүкнә экнь эн кемд түүрмд сууна. Тегәд күүкн нег аферист күүнлә таньлдад, эврәннь экин дүр наадхинь сурна. Эн саамд амнисть болад, экнь түүрмәс һарч ирнә. Энүнәс йоста шог наадн эклнә. Шин нааднд ямаран дүрнь һол гиж келж болшго. Актер болһн эврәннь дүрән йир сәәнәр нааджана. Аферистын дүриг Хальмг танһчин ачта артист Бадма Пюрвеев үзүлжәнә. Тер мет нааднд артистк Тамара Палтынова, Татьяна Зараева орлцжана.

Шин наадна белдвр гүргүдән. Режиссер Сергей Бурлаченко артистнрт сүл селвгүдән өгчәнә. Актермудын тоолврар, түрүн хәләцд наадна сюжетнь олнд медгдсн бийнь, шин шог наадна өвәрц үүлдврнь олн улсин оньг авлх. Бадм Пюрвеевин келсәр, хадм экин дүр энүнд таасгдв. Күүкд күүнә нааджасн цагт энүг таньж болсн уга. Артистын келсәр, күүкд күүнә дүр наадхд амр болсн уга.

Февралин нег шинд танһчин хәләһәчнр шин шог наад хәләһәд, чеежин сергмж авч чадх. Баснга Баатрин нертә келн-улсин театрин артистнр дарани соньн наад үзүләд, хәләһәчнрән байрлулхар белджәнә.

Батан Санжирма, Хавтхна Анатолий