Келн-улсин театр эврәннь хәләһәчнрән дәкәд нег шин наадар байрлулхмн

Баснга Баатрин нертә келн-улсин театрин коллектив эврәннь хәләһәчнрән дәкәд нег наадар байрлулхмн.Эн саамд эдн Вера Шугреван бичсн «Шарка Барка» нертә пьесар тәвсн көгжмин наад белджәнә. Энүнә режиссернь — Хальмг танһчин искусствин ачта үүлдәч Сергей Бурлаченко.

Шин көгжмин нааднд олн дуд болн би орв. Хальмгин хәләһәчнр иим шог нааднд дурта. Келхд, иим үүдәвр кесг цагас авн үзүлгдәд уга. Келн-улсин драмин театрин белдсн шин нааднд баһ наста артистнр орлцжана. Хөрн шог-наад болн инәдтә дүрмүд нааджах актермуд хойр дундур частан хәләһәчнрин оньг авлх.

Наадна һол дүр — баһ наста көвүн Барка эврәннь төрскн һазртан ирнә. Энд энүнлә олн-зүсн шогта йовдлмуд учрна. Баркан элгн-саднь шүүж авсн Шарка күүкнлә өрк-бүл тогтах зөвтә. Болв энүнд акад йовдл һарна. Тер бийнь көвүн энүнд дуран өгнә. Наадна йовудт Аркадий Манджиевин үүдәсн көгжм тусхагдна. Келхд, баһ наста актермуд сәәнәр дуулдган үзүлв, ке-сәәхн биилдгән медүлв. Эднд хальмг танһчин искусствин ачта үүлдәч, хореограф Ирина Самсонова ик нөкд болжана. Онц темдглхд, Хальмг танһчин искусствин ачта үүлдәч, театрин режиссер Сергей Бурлаченкон хальмг келәр белдж тәвсн түрүн үүдәвр болжана. Хальмг танһчд хөрн жилдән көдлснә хөөн, иим наад тәвх зөрг ирв гиж режиссер Сергей Бурлаченко келнә. Келн-улсин драмин режиссер Сергей Бурлаченко келсәр, хальмг келәр хальмгин бичәчин шин пьес белглх күцл билә. Нуувч биш, сүл цагт келн-улсин наадн баһ болв. Эннь Вера Киргуевна Шуграеван дарани белг болжана. Нег үлү, Аркадий Манджиевин шин дуд сонсж болх.

Шин нааднд олн-зүсн хальмг улсин дуд, би орв.тегәд чигн шин үүдәвриг хәләһәчнр ик оньган өгч хәләх зөвтә. Шарка Барка нертә шин наадыг драматург, режиссер болн композитор, хореограф болн артистнр хамдан ни-негн коллектив болж белджәнә. Тегәд соньн наад хәләсн әмтн икәр байрлх.

Хавтхна Элла, Хулхачин Николай