Келн-улсин музейд ветеранмудын төлә нәр-наадн бүрдәгдв

Алдр Диилврин жирн нәәмдгч жилин өөнин өмн өргнд Пальмовин нертә келн-улсин музейд "Вальс Победы" нертә байр болв. Байрин керг-үүлдврт төрскән харсгч дәәнә ветеранмудыг, тылын көдләчнриг болн танһчин зөв-йосна органмудын ветеранмудыг күндлж йөрәв. Эднә төлә соньн концертн программ белдгдв, урн һарин эрдмин һәәхүл секгдв, цергә кухнь көдлв.

Пальмовин нертә келн-улсин музейин талвнгд кесг үйин элчнр олар цуглрв. Алдр Диилврин ончта байрла ветеранмудыг йөрәхәр сурульчнр болн молодогвардейцнр, багшнр болн зөв-йосна органмудын көдләчнр ирв. Кадетнр болхла ветеранмудыг күндлж йөрәһәд, зергләнд йовцхав. Талвнгд деер углж тәвгдсн сцен деер вальс биилв, дәәнә туск дуд дуулв, шүлгүд умшв. Дәәнә ветеранмуд эврән тер цагин шүлгүд умшж өгв.

"Вальс Победы" нертә музейин байр сән зангшалд тохрв. Иим нәр-наадн жил болһн Алдр Диилврин байрин өмн өрнд кегднә. Эн өдр чилгр нарта — дулан өдр болв. Пальмовин нертә келн-улсин музейин директор Ирина Мучаеван келсәр, концерт белдв. Энүнд билгтә баһчуд орлцв, тер тоод келн-улсин музейин көдләчнр билг-эрдмән үзүлв. Нәр-наадн сән болв. Алдр Диилврин байрин өдрмүдт музйед олн әмтн ирх. Энд Алдр Диилврин байрт нерәдгдсн һәәхүл көдлжәнә.

Нәр-наадна йовудт дәәнә ветеранмудт үнтә белгүд бәрүлж өггдв, сурһульчнр гиичнрт цецгүд белглв болн георгиевск тасм зүүж өгв. Энүнә хөөн нәр-нааднд орлцсн әмтн салдсин хашар тоогдв. Энд цергә күхнь көдлв. Сурһульчнр болн офицерск балын орлцачнр, зөв-йосна органмудын көдләчнр вальс биилж өгв. Эннь нәр-наадна хамгин ончта болн удандан тодлгдх йовдл болв.

Бевина Мергн, Очра Сергей